Narazı tələbələr ABU-nun qarşısında aksiya keçirdilər
02-09-2010
Bu gün Təhsil Nazirliyinin Azərbaycan Beynəlxalq Universitetinin (ABU) lisenziyasını ləğv etməsi ilə əlaqədar olaraq universitetdə təhsil alan tələbələr və valideynləri etiraz aksiyası keçirib. Təxminən 60-a yaxın şikayətçi ABU-nun qarşısına toplaşaraq universitetin bağlanmasına etiraz edib.
Aksiya iştirakçılarından biri, 2004-cü ildə universitetin Maliyyə-kredit fakultəsini bitirən Cəfər adlı şəxs açıqlamasında bu günə qədər diplom ala bilmədiyini bildirib. Aksiyaçının sözlərinə görə, diploma görə ondan 3000 manat da alıblar. 2008-ci ildə universiteti bitirən Səfərəli Əzizov da diplom almaq üçün 3000 manatdan çox pul verdiyini, amma hələ də sənədini ala bilmədiyini qeyd edub.
Universitetin bağlanmasından ən çox isə burada təhsil alan tələbələr narahatdır. “Mən III kurs tələbəsiyəm. Bilmirəm aqibətim necə olacaq? ABU-ya test üsulu ilə daxil olsam da, hələlik mənə dəqiq məlumat verən yoxdur”, deyə beynəlxalq iqtisadi münasibətlər fakultəsinin tələbəsi Cavid vurğulayıb.
Məsələ ilə əlaqədar universitetin rəhbərliyindən mövqe öyrənməyə çalışdıq. Rektorluğun qapısı da bağlı olduğundan digər fakultələri gəzdik. Lakin universitetdə bütün fakultə dekanlıqlarının qapıları bağlı idi.
Universitetin birinci mərtəbəsində ABU-da həmkarlar təşkilatının sədri Rabil Amanovla rastlaşdıq. Məsələ ilə əlaqədar Rabil Amanov ANS PRESS-ə açıqlamasında məsələdən yeni xəbər tutduğunu bildirdi: “Mən də sizin kimi universitetin bağlanması xəbərini yeni eşitmişəm. Təşvişə düşmək lazım deyil. Təhsil Nazirliyi nə deyirsə, biz ona razı olacağıq. Hazırda burda universitetin rəhbərliyindən heç kim yoxdur. İndi hamı istirahətdədir. Diplomların verilməsinə gəlincə, kimlərin sənədləri qanunidir, hamı diplom alıb. Hazırda təhsil alan tələbələr də digər özəl universitetlərə köçürüləcəklər. Universitetə qeyri-qanuni daxil olan yoxdur. Daha heç nə bilmirəm”.
Qeyd edək ki, Təhsil Nazirliyi Azərbaycan Beynəlxalq Universitetinin fəaliyyətinin dayandırılması barədə qərar qəbul edib. Nazirliyin İcra Aparatından verilən məlumata görə, adıçəkilən məktəb lisenziyasının uzadılması üçün müraciət edib. Amma TN-in Lisenziya Komissiyası məsələ ilə bağlı araşdırma apardıqdan sonra lisenziyanın müddətinin uzadılmaması barədə qərar verib. Səbəb kimi isə məktəbin tədrisinin təşkilindəki problemlər, qanunsuz tələbə köçürmələri və digər nöqsanlardır.
