“Rusiya hakimiyyəti Cənubi Qafqaza ənənəvi münasibətini davam etdirir. Bir tərəfdən Ermənistanı öz forpostu kimi hərbi cəhətdən və digər istiqamətlərdə gücləndirməyə, başqa tərəfdən isə Azərbaycanı öz nəzarətində saxlamağa çalışır. Nəticədə konfliktin həllinə yox, idarə olunmasına çalışır”. Müsavat Partiyasının başqanı İsa Qəmbər bu sözləri Rusiya prezidenti Dimitri Medvedyevin Azərbaycana səfərinə münasibət bildirərkən söylədi. Qeyd edək ki, Rusiya ilə Ermənistan arasında imzalanan hərbi müqavilədən sonra Moskvanın Cənubi Qafqazı tamamilə ilhaq etmək siyasətinə sadiq qaldığı bir daha təsdiqləndi. Bu mənada Medvedyevin səfərinin həm də Azərbaycandakı narahatçılıqları və etirazları səngitmək, o cümlədən rəsmi Bakının Qərbə inteqrasiyasına mane olmaq niyyətinin olduğu vurğulanır.

İsa Qəmbərin sözlərinə görə, belə situasiyada Azərbaycan vəziyyətin aydınlaşmasının tərəfdarı olmalı və Rusiyadan burada beynəlxalq hüquq normalarına uyğun şəkildə mövqe tutmasını istəyə bilməlidir: “Azərbaycan hakimiyyətinin buna siyasi iradəsi çatmalıdır”.
Müsavat başqanı dedi ki, artıq Müsavat Partiyası bu istiqamətdə mövqeyini bildirib: “Yəqin ki, bu günlərdə Azərbaycanın ətrafında yaranmış gərgin geosiyasi vəziyyətlə, Qarabağ münaqişəsi ilə bağlı məsələlərə bir daha rəsmi mövqeyimizi bildirəcəyik”.
İsa Qəmbər hesab edir ki, Azərbaycan Avroatlantik məkana inteqrasiya xəttində daha ciddi, məsuliyyətli addımlar atmalıdır: “İstər dünyanın ən mükəmməl təhlükəsizlik sistemində təmsil olunmaq, istərsə də ordunu yenidən qurmaq baxımından NATO standartlarına, NATO-nun imkanlarına müraciət edilməlidir və istiqamət də bu olmalıdır”.
ADP sədri Sərdar Cəlaloğlu da Medvedyevin səfərində aydınlaşdırılmalı məsələlərin olduğunu bildirir: “Nə qədər ki, Rusiya Ermənistanla imzaladığı hərbi müqaviləsinə bir aydınlıq gətirməyib, Minsk Qrupunun həmsədri kimi bu məsələdə özünün davranışlarını Azərbaycan cəmiyyətinə, dünya ictimaiyyətinə izah etməyib, məhz bunun Azərbaycana vura biləcəyi zərbəni kompensasiya edəcək, Azərbaycanın atacağı addımlara ”yaşıl işıq" yandırmayıb, Medvedyevin Azərbaycana səfəri arzuolunmazdır".
S.Cəlaloğlu dedi ki, iqtidarın bu fikirləri nəzərə almayacağı şübhəsizdir: “Onsuz da bu səfər planlaşdırılıb. Amma heç olmasa Azərbaycan iqtidarı Medvedyevin bu səfərindən istifadə edərək həm Ermənistan-Rusiya ittifaqının neytrallaşdıracaq NATO-Azərbaycan ittifaqının yaradılması ilə bağlı Rusiyanın razılığını əldə etməlidir, həm də Rusiyanın Ermənistana etdiyi yardımları kompensasiya edəcək başqa müstəvilərdə - yəni hərbi müstəvi istisna olmaqla - daha ciddi sazişlər imzalamalıdır. Söhbət iqtisadiyyat məsələlərindən, tutaq ki, Xəzərin karbohidratlarının Rusiyadan keçmədən Avropaya ötürülməsində Azərbaycan özünün xarici siyasətində daha ciddi addımlar atmaq üçün Rusiyanın razılığını almalıdır. O cümlədən Azərbaycanın işğal olunmuş ərazilərinin azad olunmasında Ermənistana verilən hərbi dəstəyə ekvivalent diplomatik dəstək Rusiyadan alınmalıdır. Əks halda, Rusiyanın Ermənistanla bu əlaqəsi faktiki olaraq Azərbaycana qarşı yönəldiyindən Medvedyevin Azərbaycana gəlişi bir düşmən dövlətin, yəni Ermənistan prezidenti Sərkisyanın gəlişi ilə eyni məna kəsb edir və bu da arzuolunmazdır”./Yeni Müsavat