Son vaxtlar rəsmi Tiflis Gürcüstanla Azərbaycan arasında konfederasiya yaradılması barədə açıqlamalar verir. Belə ki, Gürcüstan tərəfi iki ölkə arasında konfederativ qarşılıqlı münasibətlərin formalaşmasının mümkünlüyü fikrindədir. Maraqlıdır, indiki çətin durumda, yəni Qarabağ münaqişəsinin mövcud olduğu, Rusiyanın Ermənistanla 2044-cü ilə qədər yeni hərbi müqavilə bağladığı bir vəziyyətdə Gürcüstanla konfederasiyanın yaradılması Azərbaycanın təhlükəsizliyinə qarant ola bilərmi? Ümumiyyətlə ölkəmizə konfederasiyanın yaranması lazımdırmı?
ADP sədrinin müavini Nurəddin İsmayılın qənaətincə, konfederasiyanın yaradılması Azərbaycanın təhlükəsizliyi üçün təminat rolunu oynaya bilməz. O, düşünür ki, ölkəmizin təhlükəsizliyi onun yeritdiyi daxili və xarici siyasətin gücündən, ətrafındakı dövlətlərlə *qurduğu diplomatik münasibətlərdən, eyni zamanda hakimiyyətin xalqa güvənindən asıldır.
N.İsmayıl indiki zamanda Gürcüstanla Azərbaycan arasında konfederativ münasibətlərdən daha çox yeni əməkdaşlığa ehtiyac var: «Əsrin əvvəllərində yaranan «Avropa evi» kimi «Qafqaz evi»nin də ortaya gəlməsi ilə bağlı fikirlər səslənib. Amma buna baxmayaraq, həmin məsələ indiyə qədər gerçəkləşməyib. Konfederasiyanın yaradılması isə iki ölkənin iqtisadi inkişafına stimul versə də, bu, eyni zamanda beynəlxalq güclərin Azərbaycana qarşı qərəzli münasibətin formalaşmasına gətirib çıxara bilər. Ona görə də, indiki halda Gürcüstan və Azərbaycan arasında konfederasiyanın yaradılması məsələsi reallığa əsaslanmır. O baxımdan düşünürəm ki, ölkəmiz «Qafqaz evi»ndəki rolunu təkcə Gürcüstanla konfederasiya kontekstində yox, bütövlükdə regionda gedən proseslərdə aktiv iştirak etməklə davam etdirməlidir. Azərbaycan eyni zamanda beynəlxalq səylərin onunla əlaqədar formalaşmış mənfi fikri ardan qaldırmağa, bir nömrəli problemi olan Dağlıq Qarabağ məsələsində özünün mövqeyini möhkəmləndirməyə, eləcə də Türkiyə ilə münasibətlərini yüksək səviyyəyə çatdırmağa nail olmalıdır. Azərbaycanın təhlükəsizliyinin təminatı üçün Türkiyə dövləti ilə əsasən hərbi və iqtisadi sahələrdə, özü də ən yüksək səviyyəli razılaşmalar əldə olunmalıdır».
Həmsöhbətim bildirdi ki, konfederativ münasibətlər yaransa da, bu, daha çox Gürcüstan üçün xeyirli olacaq: «Çünki Azərbaycan yerləşdiyi geosiyasi məkana, özünün təbii sərvətlərinə görə Gürcüstandan daha zəngindir. Bu mənada konfederasiya yaranacağı halda Gürcüstan böyük iqtisadi, siyasi faydalar əldə etmək imkanı qazanacaq. Bununla belə konfederasiya elə şərtlər əsasında formalaşmalıdır ki, Azərbaycanın müstəqilliyinə kölgə salmasın. Bölgədə və dünyada suveren dövlət olaraq müstəqil siyasət yeritməsinə maneçilik törətməsin».
N.İsmayıl bildirdi ki, konfederasiya beynəlxalq siyasətdə, ölkələrin iqtisadiyyatı üçün stimul olan tədbirlərdə, diplomatik məsələlərdə eyni istiqamətlərdə addım atmaq imkanlarını yaradır: «Eyni zamanda konfederasiya subyektlərindən birinə xarici təhlükə yaranarsa, digərləri ona hərbi yardım göstərməlidir. Əgər gələcəkdə, məsələn, Rusiya ilə Gürcüstan arasında hərbi münaqişə baş verərsə, onda Azərbaycan tərəfi öz mövqeyini ortaya qoymalıdır. Bu halda isə ölkəmiz Rusiyanın ciddi və xoşagəlməz təzyiqi ilə üzləşə bilər. Yəni məsələnin müsbət tərəfi olduğu kimi zərərli cəhətləri də mövcuddur».
