Azərbaycan baş prokurorunun birinci müavini Rüstəm Usubov ötən il aprelin 30-da Azərbaycan Dövlət Neft Akademiyasında (ADNA) baş verən qanlı olayla bağlı APA-ya açıqlama verib. Neft Akademiyasında baş verən ağır cinayət işinin açılmasının təmin edildiyini deyən R.Usubov maraqlı bir açıqlama da verib: “Terrorun təşkilatçısı olan Mardun Qumaşyan hazırda İnterpol xətti ilə axtarışdadır”. Rüstəm Usubovun dediklərinə aydınlıq gətirmək üçün İnterpolun Azərbaycandakı Milli Mərkəzi Bürosuna müraciət etdik. Növbətçi hissədən bizi rəis müavini Zaur müəllimlə (soyadını demədilər-red.) calaşdıracaqlarını deyib əlaqə nömrələrimizi götürsələr də günün sonuna kimi sorğumuza cavab verilmədi.

ADNA işi üzrə ömürlük həbsə məhkum olunmuş Gürcüstan vətəndaşı Cavidan Əmirovun vəkili Soyanxan Mustafayev isə baş prokurorun I müavini ilə razılaşmadığını dedi: “Rüstəm Usubovun nəyə əsaslanıb belə bir açıqlama verməsi mənə qaranlıqdır. Mən Mardun Qumaşyanla bağlı verdiyim sorğuya cavab almışam. Həmin sorğunu may ayında İnterpolun Gürcüstanın Milli Mərkəzi Bürosuna Gürcüstanın ölkəmizdəki səfirliyi vasitəsilə vermişdim. Həmin sorğuma bu gün (dünən-red.), avqustun 26-da cavab verilib. Gürcüstanın ölkəmizdəki konsulu Mindia Sanadzenin imzası ilə mənə təqdim edilmiş 8/138-98 saylı rəsmi cavabda yazılıb ki, Marneulu rayonu, Şulaveri kəndində yaşayan Gürcüstan vətəndaşı, 6 mart, 1951-ci il təvəllüdlü Mardun Qriqoriyeviç Qumaşyan Gürcüstanda mühakimə olunmayıb və barəsində İnterpolun Gürcüstan Milli Mərkəzi Bürosuna axtarış barədə hər hansı məlumat daxil olmayıb, yəni Mardun Qumaşyan axtarışda deyil. Bilirsiniz ki, məhkəmə gedərkən mən İnterpola da sorğu ilə müraciət etmişdim və arayış alıb məhkəməyə vermişdim ki, Mardun Qriqoriyeviç Qumaşyan axtarışda deyil. Onun barəsində cinayət işinin ayrılıb-ayrılmamasına aydınlıq gətirilməsini tələb etsəm də mənə bu barədə rəsmi yazılı cavab verilmədi. Mən bu məsələnin aydınlaşdırılması və həqiqətin üzə çıxması üçün bir çox rəsmi instansiyalara yazdım. Görünür, indi özlərini sığortalamaq üçün belə bir açıqlama veriblər. Amma onu da deyim ki, İnterpola Qumaşyan barədə heç belə sorğunun verilməsinə ehtiyac yoxdur. Azərbaycanın Baş Prokurorluğu Mardun Qumaşyan barədə həqiqətən də ciddi sübut və faktlar toplayaraq onu əsas işdən ayırıbsa, həmin cinayət işini Gürcüstanın Baş Prokurorluğuna göndərməli idi. Özü də bunu indi yox, aylar öncə etməli idilər. Bunu mən yox, qanunlar deyir. Çox yaxşı bilirlər ki, nə Gürcüstan Baş Prokurorluğu, nə də Gürcüstan məhkəməsi Azərbaycandakı kimi yuxarıdan istənilən hökmü verməyəcək. Ona görə də göndərmirlər. Canilər azadlıqda gəzib bizim millətə gülür, günahsız azərbaycanlılar isə türmədə ömürlük can çürüdür. Azərbaycanın Baş Prokurorluğu isə belə açıqlamalar verməklə işi araşdırmır”.
Maraqlıdır ki, Azərbaycanda İnterpolun Milli Mərkəzi Bürosunun rəisi, polis general-mayoru Sahib Mirzəyev 25 fevral, 2010-cu ildə APA-ya müsahibəsində Rüstəm Usubovun dünən dediklərini təkzib edən açıqlama verib. S.Mirzəyev müxbirin “ADNA-da ötən ilin aprelində baş vermiş qanlı olayla bağlı həbs edilənlərin hamısı Gürcüstan vətəndaşıdır. Bu cinayət hadisəsi ilə əlaqədar axtarışda qalan varmı” sualına belə cavab vermişdi: “O hadisə ilə bağlı axtarışda qalan yoxdur. Daxili İşlər Nazirliyinin və Baş Prokurorluğun əməkdaşlarından ibarət istintaq qrupu bu işlə əlaqədar Gürcüstanda çox ciddi əməliyyat tədbirləri həyata keçirib. Gürcüstan hüquq-mühafizə orqanları da bu işdə bizə çox köməklik göstərdi. Dövlət Neft Akademiyasında baş vermiş qanlı hadisə ilə bağlı günahkar olan şəxslərin hamısı müəyyən edilərək məsuliyyətə cəlb olunub”.
Bir açıqlamanın izi ilə səthi araşdırmamızın nəticələrini diqqətinizə çatdırdıq. Kimin düz, kiminsə səhv danışmasını şərh etmədən əməkdaşımız Tofiq Yaqublunun Şulaverə gedərək Mardun Qumaşyanla görüşməsini də yada salırıq. M.Qumaşyan əməkdaşımızla görüşdə sorğu-suala tutulduğunu deyərək iş üzrə günahsız olduğunu demişdi. Onun həyat yoldaşı isə “nə yaxşı ki, nə Azərbaycanda, nə də Ermənistanda yaşamırıq”, deməklə əlavə etmişdi ki, “Azərbaycanda və ya Ermənistanda yaşasaydılar, yəqin ki, bu ağır cinayət onun həyat yoldaşının boynuna qoyulardı”.
Hörmətli prokurorlarımız bu qədər böyük hadisənin çözülməsində istintaqın yol verdiyi böyük ayıbın aradan qaldırılması əvəzinə, onu daha da tirajlayırlar. Bunun səbəbini anlamaqda çətinlik çəkirik./Yeni Müsavat