İki gün əvvəl sayımızda abituriyentlərin qəbul olduğu bütün ali və orta ixtisas məktəblərində sənədlərini təqdim edərkən 20-50 mant arasında pul tələb olunması ilə bağlı xəbər dərc etmişdik. (Bizim Yol) Qeyd edək ki, tələb olunan həmin pul tələbə üçün hazırlanacaq tələbə biletinin və imtahan kitabçasının hazırlanması üçün lazım olduğu əsas gətirilir. Bu barədə əməkdaşımız ali məktəblərin birində sənəd qəbukl komissiyasında prosesi izləyərkən məlumat alıb.

Qeyd edək ki, bu il 33 mindən çox abituryent tələbə adını qazanıb. Onlardan hər birindən pul alındığını nəzərə alsaq, yığılan vəsait təxminən 1 miylon dollardan artıq edir. Burada maraqlı sual yaranır: Tələbəyə imtahan kitabçası və tələbə bileti kimin hesabına verməlildir? Tələbənin yoxsa ali məktəbin? “21-ci əsr” Təhsil Mərkəzinin rəhbəri Etibar Əliyev deyir ki, istənilən halda tələbədən əlavə pullar tələb edilir. O da təsdiqləyir ki, tələbə biletinin, qiymət kitabçalarının verilməsi adı ilə pul yığılır: “Azərbaycanda təhsil ocaqları qapalıdır. Buna görə də onlardan məlumat almaq olmur, bəzən bu səbəbə görə xəbərlər şayə şəkilində olur. Amma bizdə olan məlumata görə də bu tip xəbərlər həqiqətdir”.

Etibar Əliyev ali təhsil müəssələrində bu qayda ilə pulun yığılmasının korrupsiya olduğunu qeyd etdi: “Bu hallar həm də valideynlərin mübarizə aparmadığına görə yaranır. Bundan istifadə edən məktəb rəhbərləri məbləğləri daha da qaldırırlar. Valideyinlər təhsilin keyfiyyətinin yaxşılaşdırılması üçün xidmətə müdaxilə edə bilmirlər».

Təhsil eksperti onu da qeyd etdi ki, hər bir tələbənin özü tələbə biletini müstəqil şəkildə sifarş verərək, ali məktəbə gətirə bilər. Bu zaman ali məktəb rəhbəri tələbənin biletinə möhür vurmaqla təsdiqləyər: “Bu, tələbəyə çox ucuz başa gələr. Amma buna imkan verilmir. Əslində tələblərin əksər hissəsi ödənişli təhsil alır və təhsil haqları da yüksəkdir. Bu qədər pul ödəyən tələbədən bu adla pul alınması məntiqə sığmır. Bunu ali məktəblər öz daxili imkanları hesabına da edə bilərlər. Bunun əvəzində bazar açmaq, bu yolla gəlir götürməyin özü ən azından insafsızlıqdır, ələ baxmaq əlamətidir”.