Son zamanlar Səhiyyə Naziri Oqtay Şirəliyevin oyundan kənar duruma salınması ilə bağlı çeşidli xəbərlər yayılıb. Aptek sahələrinin tam olaraq tanınmış səhiyyə mütəxəssisi Cəmil Əliyevin kurasiyasına keçdiyini, onun isə “Zəfəran” apteklər şəbəkəsi yaratdığı barədə də məlumatlar verilib. FaktXeber.com-un PİA-ya istinadən verdiyi məlumata görə, dövlət artıq səhiyyə ocaqlarının da Oqtay Şirəliyevin nəzarətindən çıxrmağa hazırlaşır.
 
Mənbənin sözlərinə görə səhiyyəyə yetəri qədər vəsait ayrılsa da, bir sıra sahələrin pullu xidmətə keçməsinə baxmayaraq, lazımi nəticələr əldə edilmir. Bakıdan fərqli olaraq bölgələrdə durumun daha ağır olduğunu, artıq özəl klinikaların dövlət müəssisələrini sıradan çıxardığını bildirirlər. Bununla bağlı dəfələrlə nazirə iradlar bildirilsədə, hətta bu işi bir başa onun birinci müavininə həvalə etsələr də, lazımi nəticələr əldə olunmayıb. Məhz buna görə səhiyyə sistemi bir neçə sahəyə ayrılıb və başqa-başqa insanlar bu sahələrə nəzarət edir.
 
Mənbə bildirir ki, dövlət xəstəxanalarının fəaliyyətinə hazırda əl qoymaq həddində olan şəxs isə Fövqəladə Hallar Naziri Kəmaləddin Heydərovdur. Bildirilir ki, nazirə yaxın olan səhiyyə mütəxəssisləri konkret proqrama da sahibdilər. Onların təklifi bundan ibarətdir ki,dövlət xəstəxanaları xüsusi sahələr üzrə yenidən formalaşdırılsın və mərkəzləşmiş fəaliyyət sistemi qurulsun.
 
Bundan başqa səhiyyə sistemində rüşvət sisteminə nəzarət etməyin mümkünsüzlüyü nəzərə alınsın və rüşvət olaraq ortada dövr edən pullar leqallaşdırılsın. Yəni dövlət səhiyyəsi yarım pullu sistemə keçsin. Yarım pullu sistemə keçid olarsa, həm pullara nəzarət etmək mümkün olacaq, həm də səhiyyə ocaqlarının durumunu qaydaya salmaq rahatlanacaq.
 
Çox maraqlıdır ki, mövqelərini itirən səhiyyə naziri buna nəinki təpki göstərmir, hətta bunlarla razılaşır da.