Açılması ilə məşhurlaşması bir olan “Teleqüllə” restoranında bir dəfə oturmaq, Bakını şəhərin ən hündür nöqtəsindən seyr edə-edə nahar, ya da şam eləmək. Bundan daha yaxşı istirahət düşünə bilməzsən. Artıq dediyimiz kimi, açılışına prezidentin də qatıldığı restoran paytaxtımızın ən yüksək nöqtəsində yerləşir. Restoran haqqında bu günə qədər çox eşitmişdik. Sonda bu qərara gəldik ki, yüz dəfə eşitməkdənsə bir dəfə görməyimiz yaxşı olar. Dünən sözügedən restorana yollandıq. Restoranın qarşısında 10-15 ofisiant və nəzarətçi dayanmışdı. Girişdə isə bizi bir xanım və bəy qarşıladı. Oturmaq üçün iki yer təklif etdilər: “Buyurun, keçin. İstəyirsinizsə yuxarı qalxın, istəmirsinizsə, burada açıq havada əyləşə bilərsiniz”.

Restoranın birinci mərtəbəsi göz qamaşdırır. Həqiqətən də deyildiyi qədər var imiş. Restoranın interyeri çox orijinal üslubda, xüsusi işləmələrlə bəzədilib. Qüllənin sonuncu - 27-ci mərtəbəsində yerləşən restoran yerdən 360 metr hündürlükdədir. Restorana qalxmaq üçün “Teleqüllə”nin içində iki lift quraşdırılıb. Burada bizə liftə qədər bir nəfər bələdçilik etdi. Liftin enməsini gözləyənə qədər bələdçi ilə söhbət etdik. İlk olaraq restorana gələn müştərilərlə maraqlandıq. Bələdçi bildirdi ki, bura sadə adamlar gəlmir: “Bizim qonaqlar xüsusi adamlar olur. Elə bir məmur yoxdur ki, bura gəlməsin. Hətta burada ad günləri keçirənlər də olur. Çox adam bahalığından çəkinib bura gəlməyə tərəddüd edir. Ancaq mən bu gözəlliyi görmək üçün milyonlarımı da xərcləyərəm”.
Bələdçi ilə söhbət zamanı məkana  girişin pullu və xüsusi icazə ilə olmasından da danışdıq. O dedi ki, bu məsələdə istisna hallar var: “Əvvəllər belə idi ki, restorana gəlmək üçün müvafiq orqanlardan icazə tələb edilirdi. Elə indi də belədir. Ancaq baxır yuxarıdakı qonağa. Hətta ilk günlər restorana qalxmaq üçün qüllənin arxa hissəsindən əlavə giriş qapısı açılmışdı, bura ayrıca, tamamilə yeni yol çəkilmişdi. Yol artıq asfaltlanıb da”.
Bir neçə dəqiqədən sonra dillərdən düşməyən restorana çatdıq. Biz orada olanda restoranda demək olar ki, müştəri yox idi. Azsaylı qonaqlar arasında bir xanımla əyləşmiş məşhur şair Baba Vəziroğlunu gördük. Nəzarətçilər bildirdilər ki, qonaqlar əsasən saat 21:00-dan sonra gəlir. Bakının ən hündür yerində, ən hündür tikilinin ən hündür nöqtəsində yerləşən restoranın əsas özəlliyi onun döşəmə hissəsinin fırlanmasıdır. Bu da paytaxtın bütün panoramını seyr etməyə imkan verir. Döşəmənin bir dəfə dövr etməsi 45 dəqiqə çəkir.
Ofisiant menyunu bizə təqdim etdi. Elə ilk səhifəsində qiymətlərin od tutub yandığını gördük. Bir porsiya balıq 50 manata satılır. Birinci səhifədəki bütün yeməklər 40-50 manatdan aşağı deyil. Salatların da qiyməti yüksək və müxtəlifdir - 10 manatdan 40 manata qədər. Paytaxtın heç bir yerində olmayan bütün şərab növlərini bu restoranda tapmaq olar. Burada bir şüşə şərabın 200-300 manata qədər qiyməti var.
Bir “Sezar” salatı və ananas şirəsi sifariş edəndən sonra restoranda gəzişmək qərarına gəldik. Nəzarətçilərdən biri yenidən bizə bələdçilik etdi. Onunla bir az söhbətləşdikdən sonra hər zaman olduğu kimi, söhbəti yenə məmurlara gətirib çıxardıq. Nəzarətçinin dediyinə görə, burada yeni işləməyə başlayıb, bu işdə hələ elə çox təcrübəsi yoxdur. Həmsöhbətimiz deyir ki, bir neçə gün öncə restoran bağlanmışdı: “Bura çox özəl adamlar gəlir. Nazirlər gələndə çox vaxt öncədən restorana adam buraxılmaması üçün göstəriş verirlər. Keçən həftə də Kəmaləddin müəllim (fövqəladə hallar naziri Kəmaləddin Heydərov-red.) tərəfindən qapadılmışdı. Siz onu tanıyırsınız də yəqin ki. Xüsusi qonaqlarla gəlmişdi bura. Ona görə girişə məhdudiyyət qoyulmuşdu. Gələnlərə də həyətdəki restoran təklif edilirdi”.
Nəzarətçi bizimlə söhbətində bildirdi ki, Nəqliyyat Nazirliyi işçilərindən də bura gələnlər çoxdur: “Açılışdan bir-iki həftə sonra nəqliyyat naziri Ziya Məmmədovun oğlu Anar Məmmədov burada bir xanıma ad günü keçirib. Qonaqlığa gələnlərin demək olar ki, hamısı milyonçu balaları idi. Ancaq öz adımdan deyə bilərəm ki, əla gün keçirdi onlar. Oriyental rəqs oynayan qızlar da gətirmişdilər. Anakonda uzunluğunda bir ilan da var idi. İlan rəqsi də etdilər. Biz indi qüllənin lap başında olduğumuz üçün burada telefon işlətməyə icazə vermirlər. Yoxsa sizə həmin ad günündən çəkdiyim parçaları göstərərdim. Elə Ziya müəllimin özü də tez-tez bura gəlir”.
Nəzarətçidən burada daha hansı maraqlı olaylarla rastlaşdığını soruşuruq. O, bir az düşünəndən sonra dedi ki, bura əsasən məmurlar gəldiyi üçün həddən artıq maraqlı hadisələrlə qarşılaşırlar: “Bu yaxınlarda bir nəfər iki qadınla bura gəlmişdi. Qadınlardan birinin 30, digərinin isə 40 yaşı olardı. Əslində kiməsə durub diqqətlə baxmaq, işimizdən kənar məsələlərlə məşğul olmaq kimi icazəmiz yoxdur. Ancaq həmin xanımların yerli-yersiz hərəkətlər etməsi diqqətimi çəkdi. Yanındakı adamla müxtəlif oyunlardan çıxırdılar. Həmin adamın kimliyi ilə maraqlandım. Sadəcə mənə maraqlı gəldi. Onda mənə dedilər ki, sən hər işə qarışma, o adam nazirdir. Füzuli Ələkbərovu (əmək və əhalinin sosial müdafiəsi naziri-red.) mən həmin vaxt tanıdım”.
Nəzarətçi ilə söhbətimiz pis getmirdi. Yeni suallar verir, daha maraqlı hadisələri danışacağını səbirsizliklə gözləyirdik. Ancaq davamlı suallarımız nəzarətçini deyəsən, şübhələndirmişdi. Vəziyyətdən çıxmaq üçün mövzunu dəyişsək də az sonra yenidən söhbətə başladıq. Həmsöhbətim bildirdi ki, restorana ən çox gələnlərdən biri də Bakı meri Hacıbala Abutalıbovdur: “Hacıbala müəllimi tanımamış olmazsınız. O da bu restorana tez-tez gəlir. Çox yaxşı və sakit insandır. Gəlib burada sakitcə oturur. Bütün Bakını izləyir. Çox vaxt tək gəlir. Ancaq elə bil dərdlidir o. Elə yazıq-yazıq oturur ki, elə bil bu boyda paytaxtın yiyəsi bu deyil. Hər dəfə gələndə də əsasən çay içir. Sanki qüllənin fırlanmasından həzz alır. Maraqlı adamdır”.
Müsahibim bildirdi ki, restorana gələnlər arasında Bakıda çalışan xarici iş adamları, diplomatlar da az deyil. Biz orada olduğumuz zaman xarici qonaqların çox gəldiyinə özümüz də şahid olduq: “Səhiyyə naziri (Oqtay Şirəliyev-red.) də bura çox gəlir. Təhsil naziri Misir müəllim (Mərdanov-red.) isə hər dəfə yanında 3-4 nəfər gətirir. Ümumiyyətlə, dediyim kimi, bura çox maraqlı və məşhur adamlar gəlir. Sizin bəxtinizdəndir deyəsən, bu gün elə də çox müştəri yoxdur”.
Qeyd edək ki, yeməklər birinci mərtəbədə hazırlanıb sonra yuxarı çıxarılır. Restoranda əsasən klassik musiqi parçaları səsləndirilir. Buranın xüsusi fotoqrafı da var. Bir sözlə, bu restoranda insanları gülərüzlə qarşılayırlar. Restoranda olduğumuz zaman bunu da öyrəndik ki, nazirlərin bir araya gəldiyi yeganə restoran “Teleqüllə”dir. Restoran gündüz saat 12-dən gecə 12-yə qədər işləyir. İstəyən getsin. Çox maraqlı hadisələr və adamlar görə bilərsiniz orada...