“Bu fikir, Birləşmiş Ştatların təhriki ilə BMT-nin İrana qarşı qəbul etdiyi qətnamədən sonra səsnəndirilmiş bəyanatın konteksində şərh olunmalıdır” – bu sözləri politoloq Elşən Manafov İran prezidentinin “yaxın üç ay ərzində Amerika iki Şərq ölkəsinə hücum edəcək” bəyanatına münasibət bildirərkən FaktXeber.com-a dedi: “Mərkəzi Kəşfiyyat İdarəsinin sabiq direktoru bu günlərdə belə bir fikir açıqlayıb ki, ABŞ bu ilin noyabr ayına qədər İranın nüvə proqramı ilə bağlı səylərinin qarşısını almasa, yaxın perspektivdə İranın qarşısını almaq mümkün olmayacaq. Eyni zamanda Rusiya prezidenti Dmitri Medvedyev də belə bir bəyanat verdi ki, İran nüvə enerjisinə sahib olmağın bir addımlığındadır. Bu kimi bəyanatlar təbii ki, İranın iqtisadi inkişafını qəbul etməyən Qərb dövlətlərinin Orta Şərq ölkələrindəki maraqlarına hesablanıb. Hər bir vəchlə İranın nüvə proqramının qarşısını almağa çalışırlar ki, digər ölkələr İrana yaxınlaşmasın”.

E.Manafov qeyd etdi ki, Qərb İrana qarşı sanksiyalar və hədələr ilə İranın neft-qaz sektorunu hədəfə götürüb: “İran böyük neft-qaz ölkəsi olsa da daxili bazarını təmin etmək üçün kifayət qədər benzin emal etmək gücündə deyil. Buna görə də artıq sürücülər üçün gün ərzində nəzərdə tutulmuş limit 100 litrdən 60 litrə endirilib. Qiymətlər isə sabit olaraq qalır. Bizim manatla müqayisədə benzinin litri 0,15 manatdır. Belə bəyanatlar İranın daxildə yaranan enerji böhranının qarşısını almaq üçün görülən tədbirlərdir”.

Bir qədər əvvəl ABŞ-ın Suriya ilə məlum mövqeyi var idi. İki dövlət deyəndə mənə elə gəlir ki, İranla Suriya nəzərdə tutulur – deyə bildirən E.Manafov əlavə etdi: “İran İraq deyil, onunla İraq kimi davranmaq mümkün olmayacaq. İran prezidentinin bəyanatı onu göstərir ki, artıq ABŞ-ın İran və Suriya ilə planları ciddi xarakter alıb. Bununla bağlı Amerikada əhali arasında keçirilən sorğunun nəticələrinə görə Pentaqon və Ağ Ev cəmiyyətdə İrana qarşı hərbi əməliyyatların zəruriliyi haqda rəy formalaşdırır. Eyni zamanda İranla bağlı qalmaqala Rusiyanın mövqeyini də gözləmək lazımdır. Çin isə hələlik susur”.

Əhmədi Nejadın bəyanatı gerçəkləşərsə, ABŞ üçün hansı nəticələr gözlənilir – sualını müsahibimiz belə şərh etdi: “Pentaqonun bu ilki büdcəsi təxminən 467 milyard dollar məbləğindədir. Bu da Rusiyanın dövlət büdcəsindən artıqdır. Eyni zamanda ABŞ-ın dövlət borcu 14 trilyondan çoxdur. Başlaya biləcək müharibə üçün İran da təhlükəsizlik tədbirləri görüb. Mən hesab edirəm ki, İran-ABŞ münasibətlərində rəsmi Vaşinqton Türkiyənin İranı dəstəkləməsini də nəzərə almalıdır”.

Əli Mövlud