Azərbaycanlı ekspertlər bu qənaətdədir. Azərbaycanlı politoloqlara görə, rəsmi Bakı yenilənmiş Madrid prinsiplərini qəbul etdikdən sonra bu prinsiplərə nə “hə”, nə də “yox” deyən Ermənistan beynəlxalq birlik qarşısında pis vəziyyətdə qalmışdı və bu səbəbdən yenə də onun köməyinə müttəfiqi çatıb. Politoloq Xaləddin İbrahimliyə görə, bu addımı ilə Ermənistan nizamlama prosesini labirintə salmaq, Dağlıq Qarabağ ətrafında əsəbi və gərgin mühit yaratmaq istəyir.

“Ermənistanın son mövqeyi, Sarkisyanın son bəyanatı Rusiyanın siyasi mətbəxində hazırlanmış bir bəyanatdır. Onlar vəziyyətin daha əsəbi, daha gərgin mərhələyə keçməsini istəyirlər. Fikirləşirlər ki, parlament seçkiləri ərəfəsində gərginlik yaratmaq mümkündür”,- deyə politoloq Xaləddin İbrahimli bildirib.

Xaləddin İbrahimli onu da qeyd edib ki, Ermənistan Sankt-Peterburq təkliflərini önə çəkməklə, bu məsələdə Rusiyanın əsaslı marağını və rolunu diqqətə çatdırmaq istəyir, Rusiyasız bu məsələnin həllinin mümkün olmadığını göstərməyə çalışır.

Politoloq İlqar Məmmədov isə Azərbaycanın Sankt-Peterburq görüşündə iştirakını yanlış addım hesab edir. Onun sözlərinə görə, Rusiya məhz Ermənistanın mövqeyini xilas etmək üçün bu görüşü təşkil etmişdi: “Biz yenilənmiş Madrid prinsiplərinə istinad edəndə, onlara da Sankt - Peterburqdakı hansısa təkliflərə istinad edəcək və beləliklə də danışıqlar prosesi yenidən uzanacaq. Rusiya tərəfi bir daha sübut etdi ki, o daim danışıqlar prosesi ərzində Ermənistanın sifətini xilas etməyə çalışacaq. Hətta bu ayın əvvəlində Kanadada Obama, Sarkozi və Medvedevin bəyanatı Madrid prinsiplərini tam əks etdirirsə, Kremlin saytındakı rusca tərcüməsi üç təhriflə verilmişdi ki, onların 3-ü də Ermənistanın xeyrinə idi. Beynəlxalq sənədləri də saxtalaşdırmaqdan çəkinmirlər.

Rusiyanın açıq-aydın Azərbaycanı aldatdığını qeyd edən ekspert ötən il Moskvanın Azərbaycanın Türkiyə-Ermənistan yaxınlaşmasına mane olmasında maraqlı olduğunu və bunun müqabilində Ermənistanı yola gətirəcəyi ilə bağlı Bakıya söz verdiyini deyib. Amma cənab Məmmədov onu da əlavə edib ki, Türkiyə-Ermənistan yaxınlaşması iflasa uğradıqdan sonra Moskvanın siyasəti yenidən 180 dərəcə dəyişdi və nəticədə ortaya qeyri-müəyyən Sankt-Peterburq təklifləri çıxdı. “Onları digər həmsədr ölkələr dəstəkləmirsə, demək o mövcud deyil. Onlar yalnız o halda mövcud ola bilər ki, 3 ölkə tərəfindən dəstəklənsin. Bu halda Bakı da cavab verməlidir”,- deyə politoloq İlqar Məmmədov bildirib.

Politoloq Vəfa Quluzadə isə bu qənaətdədir ki, Azərbaycan Sankt-Peterburq təkliflərini də qəbul etsə, Ermənistan bu dəfə də bu prinsipləri qəbul etmədiyni bəyan edəcək. Çünki burada məqsəd tamamilə başqa, münaqişənin həllinin uzanmasıdır. Nə hərb, nə sülh variantı hazırda Rusiyanı tam təmin edir: “Ermənistan müstəqil dövlət deyil, Rusiya Ermənistanı oyuncaq kimi oynadır, amma dünyaya təqdim edir ki, Ermənistan belə istəyir. Onlardan Rusiya “forpost” yaradıb və şərqə doğru irəliləmək istəyir. Bütün təklifləri Rusiya hazırlayıb və elə hazırlanıb ki, qəbulolunmaz olsun. Bu, Qarabağ tələsi adlanır. Təkliflərin mahiyyəti ərazi bütövlüyünə hörmət, öz müqəddəratını təyin etməyə hörmət - bu iki zidd prinsip ortaya qoyulub ki, qəbul olunmasın”.

Ekspertlər Sankt-Peterburq görüşündə Azərbaycana 5 rayonun qaytarılması müqabilində Dağlıq Qarabağa statusun verilməsi təklifinin də irəli sürüldüyü istisna etmirlər. Vəfa Quluzadə onu da qeyd edir ki, belə bir təklifi Azərbaycan heç vaxt qəbul edə bilməz. “Status sözü yoxdur, status müstəqillik deməkdir”,- deyə Vəfa Quluzadə bildirib.  ans

Bəzi ekspertlər hazırda yaranmış vəziyyətdə Azərbaycanın danışıqlara bir müddət ara verməsini təklif edirlər. Amma bunun rəsmi Bakının zərərinə olacağını düşünənlər isə əksinə danışıqların davam etdirilməsinə tərəfdardır. Eyni zamanda ekspertlər bu qənaətdədir ki, bununla belə Azərbaycan son zamanlar baş verənlərdən nəticə çıxarmalı və gələcəkdə danışıqlar prosesini elə qurmalıdır ki, Rusiyanın hər hansı vədinə rəğmən bu proses irəliləyə bilsin.