ABŞ dövlət katibi Hillari Klintonun Bakıya birgünlük səfəri başa çatsa da , bununla bağlı müzakirələr hələ uzun müddət davam edəcək . Çünki həm hakimiyyət dairələri , həm də bəzi müxalifət qurumları xanım Hillarinin səfərinə böyük ümid bəsləyirdilər . Amma onun prezident İlham Əliyevin Dağlıq Qarabağ məsələsində Ermənistana təzyiq göstərmək çağırışlarına önəm verməməsi , Azərbaycan müxalifəti ilə deyil , bir qrup gənclərlə görüşməsi , bununla belə , ölkəmizdəki demokratiyanın vəziyyətindən danışmaması ABŞ dövlət katibinə olan ümidləri sarsıtdı . Müzakirələrə səbəb də bu umidlər və onların doğrulmamasıdır .
Məsələyə aydınlıq gətirməyə çalışan Azərbaycan Demokratik Sol Partiyasının ( ADSP ) sədri Elşən Manaflı dedi ki , rəsmi Bakı H . Klintonun nəhayət İrəvana təzyiq göstərərək , işğal olunmuş rayonlardan beşinin azad edilməsi istiqamətində aparılan danışıqlara dəstək verəcəyini güman edirdi : « Lakin məlum oldu ki , ABŞ dövlət katibinin Ermənistana heç bir təzyiq göstərmək fikiri yoxdur . Əksinə , Türkiyə ilə Ermənistan arasındakı mövcud münasibəti qabardaraq , Ankaranı bu istiqamətdə müəyyən addımlar atmağa çağırdı . Yəni Bakıda aparılan danışıqlar bir daha göstərdi ki , Vaşinqton üçün Dağlıq Qarabağ münaqişəsinin çözümü deyil , daha çox Ankara - İrəvan münasibətlərinin normallaşması , Sürixdə imzalanmış sənədlərin Türkiyə parlamentində ratifikasiyası prioritetdir . Təbii , bu , regionda enerji təhlükəsizliyi baxımından ABŞ - ın dövlət maraqlarına aid olan bir məsələdir . Çünki Amerika yaxşı bilir ki , Ermənistan - Azərbaycan münaqişəsi ərazidə mövcud iqtisadi layihələri , sabitliyi poza biləcək konfliktlərdəndir . Amma bununla belə , ABŞ düşünür ki , məhz Türkiyə və Ermənistan arasındakı münasibətlərin normal müstəviyə gətirilməsi gələcəkdə Dağlıq Qarabağ münaqişəsinin beynəlxalq hüquq normaları çərçivəsində tənzimlənməsinə bu və ya digər mənada təsir göstərəcək . Əlbəttə , bu kontekstdə ABŞ - ın Rusiya ilə bölgədəki maraqları kifayət qədər fərqlənir ».
ADSP sədri H . Klintonun Gürcüstanda bu ölkə müxalifətilə görüşünə diqqət ayıraraq , bununla bağlı Azərbaycan müxalifətinin ümidlərinin boşa çıxdığını söylədi : « Xanım Hillari səfər çərçivəsində həbsdə olan bloggerlərin azad edilməsilə barədə Azərbaycan hakimiyyətinə tövsiyələrini versə də , bu , simvolik xarakter daşıyan amillərdən idi . Əslində Amerika enerji təhlükəsizliyi , neft və qazla bağlı sövdələşmələrə insan hüquq və azadlıqlarından daha çox önəm verir . ABŞ ilk əvvəl Yaxın və Orta Şərq doktrinasını həyata keçirməyə , Əfqanıstandakı hərbi kontingenti təchiz etmək məsələlərində rəsmi Bakıyla münasibətlərdə gərginliyə yol verməməyə , bundan sonra da beynəlxalq terrorizmə qarşı mübarizədə Azərbaycanın onun yanında olmasına çalışır ».
E . Manafov H . Klinton da daxil olmaqla indiyədək ölkəmizə Birləşmiş Ştatlar administrasiyasının üç yüksək çinli rəsmisinin səfər etdiyini xatırlatdı : « Azərbaycana eks - prezident Ayaz Mütəllibovun dövründə ilk dəfə ABŞ - ın o vaxtkı dövlət katibi Beyker səfər edib . Uzun illərdən sonra ölkəmizdə Amerikanın müdafiə naziri səfərdə oldu . Bundan sonra isə H . Klinton təşrif buyurdu . Təəssüf ki , bu səfər Dağlıq Qarabağ probleminin çözümü istiqamətində gedən danışıqlara ciddi təsir bağışlamadı . Bu , onu göstərir ki , Birləşmiş Ştatlar Gürcüstan istisna olmaqla postsovet məkanı , hətta Ukrayna kimi bir bölgə ilə bağlı mövcud Rusiya iqtidarı ilə qarşıdurmaya getmək istəmir . Əfsuslar olsun ki , artıq dünya bu və ya digər təsir dairələrinə bölünüb . Və məlum olduğu kimi , Cənubi Qafqazda maraqları toqquşan tərəflər Rusiya , ABŞ və Avropa Birliyi ölkələridir . Bu baxımdan xanım Hillarinin səfəri göstərdi ki , ABŞ Cənubi Qafqazdakı statuskvonu dəyişmək istəmir . Və bu statuskvo Rusiyanın maraqlarına cavab verdiyi kimi , hələ ki , Amerikanı da qane edir ».
Müsahibimizə görə , bütün hallarda Klintonun səfəri Azərbaycan iqtidarı ilə ABŞ administrasiyası arasında yaşanan gərginliyi aradan qaldırmaq üçün gözəl töhfə oldu : « Məlum olduğu kimi , Amerika Türkiyədən Qarabağ şərti irəli sürmədən Sürix protokollarını ratifikasiya etməsini istəyir . Məhz buna görə Bakı ilə Vaşinqton münasibətləri bir il idi pisləşmişdi . Amma H . Klintonun səfəri münasibətlərdəki gərginliyi aradan qaldırsa da , ABŞ həmişəki kimi Dağlıq Qarabağ münaqişəsilə bağlı Azərbaycan hakimiyyətinin umduğu məsələlərə etinasız yanaşdı . Qeyd etdiyim kimi , bu səfər bir daha sübut etdi ki , kiçik dövlətlərin cəlb olunduğu münaqişələrdə əsas amil beynəlxalq güclərin maraqlarından ibarətdir ».
