Azərbaycan Nazirlər Kabineti “İmmiqrant statusu olmayan əcnəbilərin və vətəndaşlığı olmayan şəxslərin Azərbaycan Respublikasının hüdudlarından kənara çıxarılması qaydaları”nı təsdiq edib.

Qaydalara görə, immiqrant statusu olmayan əcnəbilər və vətəndaşlığı olmayan şəxslər qanunvericiliyin tələblərini kobud surətdə pozduqda, Daxili İşlər Nazirliyinin, Dövlət Miqrasiya Xidmətinin və ya məhkəmənin qərarı əsasında Azərbaycan Respublikasının hüdudlarından kənara çıxarıla bilərlər.

İmmiqrant statusu olmayan əcnəbilər və vətəndaşlığı olmayan şəxslər insan alverindən zərər çəkmiş hesab olunduqda, onlar barəsində 1 il müddətində Azərbaycan Respublikasının hüdudlarından kənara çıxarılma tətbiq edilmir və qanunvericiliklə müəyyən olunmuş qaydada qeydiyyata alınırlar. İnsan alverinin qurbanı olmuş uşaqlar barəsində ölkə hüdudlarından kənara çıxarılma tətbiq edilmir. Şəxsiyyətlərini müəyyən etmək mümkün olmayan insan alveri qurbanları Azərbaycan Respublikasının hüdudlarından kənara çıxarılırlar.

İmmiqrant statusu olmayan əcnəbilər və vətəndaşlığı olmayan şəxslər insan alveri və Azərbaycan Respublikasının milli təhlükəsizliyi - dövlətin müstəqilliyi, suverenliyi, ərazi bütövlüyü, konstitusiya quruluşu, xalqın və ölkənin milli maraqları, insanın, cəmiyyətin və dövlətin hüquq və mənafeləri ilə bağlı cinayət təqibi orqanlarına yardım göstərdikdə, həmin şəxslər barəsində Azərbaycan Respublikasının hüdudlarından kənara çıxarılma cinayət təqibi başa çatanadək tətbiq olunmur.

Daxili İşlər Nazirliyinin və Azərbaycan Respublikası Dövlət Miqrasiya Xidmətinin qərarlarında immiqrant statusu olmayan əcnəbilərin və vətəndaşlığı olmayan şəxslərin respublikanın hüdudlarından kənara çıxarılması əsaslandırılmalıdır.

İmmiqrant statusu olmayan əcnəbilər və vətəndaşlığı olmayan şəxslər onların Azərbaycan Respublikasının hüdudlarından kənara çıxarılması haqqında qəbul olunmuş qərarda müəyyən edilmiş müddətdə (48 saat) ölkə ərazisini tərk etməlidirlər.

İmmiqrant statusu olmayan əcnəbilərin və vətəndaşlığı olmayan şəxslərin ölkə hüdudlarından kənara çıxarılması ilə bağlı sənədləşmə yubandıqda və ya çıxarılma haqqında qərarın icrasına mane olan digər hallar (həmin şəxslərin təcili müalicəsinə ehtiyac olduqda, yaxud Azərbaycan Respublikasında yaşayan yaxın qohumları ağır xəstələndikdə və ya vəfat etdikdə) meydana çıxdıqda, çıxarılma haqqında qərarı qəbul etmiş orqan çıxarılma müddətinin uzadılması məsələsinə baxır.

Azərbaycan ərazisini tərk etməkdən boyun qaçıran immiqrant statusu olmayan əcnəbi və vətəndaşlığı olmayan şəxs müvafiq məhkəmənin (hakimin) qərarı əsasında tutulur və məcburi qaydada hüduddan kənara çıxarılır.

İimmiqrant statusu olmayan əcnəbilərin və vətəndaşlığı olmayan şəxslərin çıxarılmasına görə xərclər onların öz üzərinə düşür. Bu şəxslərin çıxarılması üçün onların vəsaitləri olmadıqda, belə xərclərin ödənilməsi onları qəbul edən idarə, müəssisə və təşkilatların, qərarı icra edən orqanın üzərinə düşür.

Qərardan məhkəməyə şikayət edilə bilər. Şikayətin edilməsi qərarın icrasını dayandırmır.

Barəsində Azərbaycan Respublikasının hüdudlarından kənara çıxarılma haqqında qərar qəbul edilmiş immiqrant statusu olmayan əcnəbinin və vətəndaşlığı olmayan şəxsin ölkə hüdudlarından kənara məcburi çıxarılması aşağıdakı istiqamətdə həyata keçirilir:

- əcnəbi - vətəndaşı olduğu ölkəyə;

- vətəndaşlığı olmayan şəxs - bundan əvvəl daimi yaşadığı ölkəyə, Azərbaycan Respublikasına birbaşa gəldiyi ölkəyə, onu qəbul etmək istəyi olan və bu barədə vəsatət qaldıran ölkəyə;

- ikili vətəndaşlığı olan şəxs - daimi yaşadığı və ya daha sıx əlaqəli olduğu ölkəyə.

Dövlət Miqrasiya Xidməti və Daxili İşlər Nazirliyi tərəfindən müvafiq çıxarılma barədə yuxarıda qeyd olunan istiqamətlərə Azərbaycan Xarici İşlər Nazirliyi vasitəsilə məlumat verilir.