Bakı Şəhər Icra Hakimiyətinin (BŞIH) başçısı Hacıbala Abutalıbov Füzuli küçəsi 58 ünvanında yaşamış, yaşı 70-dən yuxarı olan Quliyev Həsən Islam oğlunun ölümünə səbəb olub. Belə ki, adıçəkilən ərazi və onunla paralel olan Şəmsi Bədəlbəyli küçəsi Heydər Əliyev adına sarayın arxasından tutmuş, “Beş mərtəbə”yə kimi bütün obyekt və yaşayış binaları “Qış bulvarı” tikilməsi ilə əlaqədar sökülür. Düzdür, “Qış bulvarı” layihəsi təxirə salınsa da, sökmə işləri bu günə kimi hələ də davam edir. Sakinlər evlərinin sökülməsini bir şərtlə qəbul edirlər ki, onların evlərini bazar qiymətləri ilə alsınlar. Ancaq hökumət hər kvadrat metrə görə 1500 dollar pul verir (bir ay bundan öncə hər kvadrat metr üçün 1250 manat nəzərdə tutulmuşdu – R.D). Haqlı narazlığa görə sakinlər bununla bağlı əlaqədar icra orqanlarına şikayət və müraciət etsələr də, istəkləri səmərəsiz qalıb.

Sakinlərdən biri məhz, bu haqsızlığa dözməyərək vəfat edib. Vəfat edən sakinin oğlu Çingiz Quliyev deyir ki, təxminən fevralın 12-də bir qrup sakinlə BŞIH başçısı Hacıbala Abutalıbovla görüşmək istəyiblər: “Bizi qəbul etmədi. Getdik Prezident Administarsiyasına. Orada Nəsimi adlı şəxs sakinlərdən üçünü qəbul etdi. Problemlərimizi dinləyəndən sonra BŞIH-lə əlaqə saxlayaraq bizi qəbul etmələrini xahiş etdi. Sonradan Abutalıbov beş sakini qəbul etdi. Israrla bildirdi ki, konpensasiya hər kvadrat metr üçün 1500 dollardan artıq olmayacaq”.
Sakinlər yenidən PA-ya gedirlər, bu dəfə isə onları qəbul etmirlər. Çingiz bəy deyir ki, atası o gündən bəri əsəbi idi, özünə gələ bilmirdi: “Telefon, işıq, qaz xətlərinin kəsilməsi ona çox pis təsir etdi. Hər gün əsəbiləşirdi. Martın 2-də infarkt keçirirək vəfat etdi”.
Çingiz bəyin sözlərinə görə, onlara ya şəraitə uyğun ev verilməli, ya da bazar qiymətləri ilə konpensasiya ödənilməlidir: “Qanunda da yazılıb ki, yaşayış binasından sonuncu sakin çıxmayana qədər Binanın hər hansı bir səmtində söküntü işləri aparıla bilməz. Amma bunlar qanuna əməl etmirlər. Kim nə istəyirsə onu da edir”.
Müsahibim daha çox bir qrup sakinə hər kvadrat metrə görə 3-4 min dollar konpensasiyanın verilməsindən narazılıq edir: “Hamıya eyni gözlə baxılmalıdır. Adətən bir adamın qohumu vəzifədədirsə, onu yuxarı çəkirlər, amma burada tam başqa auradır. Kimin yaxşı əlaqəsi varsa, onun evini yuxarı məbləğlə alırlar”. Çingiz bəy prezident seçkisində Ilham Əliyevə səs verib, ancaq bundan peşmandır: “Bilsəydim belə olacaq, nəinki səs verməzdim, heç seçkiyə getməzdim”.
Çingiz bəydən ayrılarkən qonşulardan biri “indi deputat Pənah Hüseyn sakinlərlə görüşəcək” – deyərək, həyətə düşür. Biz də müsahibimizə başsağlığı verərək, sakinlərin yanına gedirik.

Ziyad Səmədzadənin qorxusu

Sakinlər ən çox adıçəkilən ərazidən deputat seçilmiş Ziya Səmədzadədən şikayətlidirlər. Onlar problemləri ilə bağlı millət vəkilindən kömək istəsələr də, “Mənə təqaüd düşür. Bu məsələlərlə bağlı müraciət etməyin” cavabını verib. Ümumiyətlə sakinlər son beş ildə bircə dəfə də olsun millət vəkillərinin üzünü görməyib. Sakinlərdən biri “biz onları yalnız televiziyada görmüşük” deyir.
Sakin Zəminə Abdullayeva deyir ki, narazı qalan ev sahiblərinin sayı minə yaxındır: “Əgər bu min nəfərin problemi həll olunmasa, onda seçki dönəmində bu min nəfərin bütün qohumları seçkidə Ilham Əliyevi dəstəkləməyəcək”.
Bundan başqa bir neçə sakin də bizimlə söhbətində I.Əliyevə inanmadıqlarını dilə gətirdilər: “Prezident Bibiheybət məscidinin açılışında demişdi ki, camaatı incitməyin. Ancaq onun bu fikrini eşidən yoxdur”.
Füzuli 31 küçəsində məskunlaşan milliyətcə yəhudi Valentin Aqurin Amerikada olarkən, onun evini söküblər. Üstəlik də evində olan bütün əşyalarını da götürüblər. Bununla bağlı o kimə müraciət etsə də, səyləri nəticəsiz qalıb. Bu azmış kimi, ona konpensasiya da ödənilməyib. Şikayətçilər arasında V.Aqurini axtarsaq da tapa bilmədik. Sonradan məlum oldu ki, ona təzyiq edərək “səsini çıxartma” tapşırığını veriblər.

“Istəyirlər ki, Həsən Quliyev kimi infarkt keçirib ölək”

Sakin Salahova 60 ildir ki, bu ərazidə yaşayır. Özünün dediyinə görə, heç vaxt bu cürə özbaşınalığın şahidi olmayıb: “Biz binada yaşaya-yaşaya işıq, qaz kəsilib. Yalandan deyirlər ki, xətdə problem var. Son iki ayı sanki küçədə yaşayırıq”.
“Istəkləri budur ki, hamımız Həsən Quliyev kimi infarkt keçirib ölək. Bəlkə bundan sonra rahatlanarlar”, – deyir sakinlərdən biri.
Sakinlərlə söhbət edərkən polislərdən biri “haradan gəlmisiniz, vəsiqənizə baxmaq olarmı?” sualı ilə bizə müraciət etdi. “Azadlıq”dan gəldiyimi biləndən və vəsiqəni təqdim edəndən sonra reportaj hazırlamağa “razılıq” verdi.

Şikayətçidən çox polis…

Ümumiyətlə, ərazidə olan sakinlərdən çox polislər gözə dəyirdi. Orada olduğumuz 1 saatın içində əlavə 4 polis maşını və Nəsimi rayon polis idarəsinin rəisi də gəldi. Bu bir daha göstərir ki, hökumət 4-5 insanın bir yerə toplaşmasından çəkinir.
Nəhayət, millət vəkilləri – Pənah Hüseynlə, Arzu Səmədbəyli gəlir. Pənah bəy sakinlərin problemlərini Milli Məclisdə səsləndirdiklərini bildirir: “Lazımı orqanlara da bu barədə məlumat vermişik. Çalışacağıq ki, sizin işinizi həll edə bilək”.
Sakinlər millət vəkillərinə onları tez-tez BŞIH-in nümayəndələrinin incitdiklərini deyirlər. Pənah bəyin “konkret kim?” sualına sakinlər “Zülfəli” deyə cavab verirlər.
Bundan sonra BŞIH-in icra katibliyinin müavini Zülfəli ilə Pənah Hüseynin debatı başlayır. Icra hakimiyətinin nümayəndəsi sakinlərin yalan danışdıqlarını qeyd edir. Ona ünvanlanan “bəzi sakinlərə kvadrat metrə görə 4 min manat konpensasiya verirsiniz?” sualına yenə eyni cavabı verir.azadliq