Salyan şəhərində yerləşən mərkəzi bazar rayon icra başçısı Əlağa Hüseynov tərəfindən qapadılıb. Bu barədə  KİV-lərdə verilən məlumata görə bazara  polis tərəfindən basqın olunub. Ticarət Mərkəzinin sökülməsinə etiraz edən satıcılarla polis arasında qarşıdurma yaranıb. Polisin həddən artıq zor tətbiq etməsi isə hadisənin şahidi Ərəbqardaşbəyli kəndinin axundu Hacı Ağahüseyn etirazına səbəb olub. “Azadlıq” qəzetinin verdiyi məlumata görə polis axunda dəyənəklə zərbələr endirib və o evdə dünyasını dəyişib.

Axundu polis öldürüb?

Dünən hadisə ilə bağlı Salyan rayonunda olan mənbələrimizlə əlaqə saxladıq. Mənbəmizin verdiyi məlumata görə bazar icra başçısının göstərişi ilə bağlanıb. Hadisə zamanı polis satıcılara, hətta qadınlara belə zor tətbiq edib. Mənbənin məlumatına görə bazar rayonun indiki və keçmiş rəhbərliyi arasında gedən mübarizə nəticəsində bağlanıb. Ə. Hüseynov sabiq icra başçısı Rasim Bəşirova və sabiq polis rəisi Fuad Məmmədova yaxın adamların obyektlərini bağlatdırır. Dünən bazarda baş verən qarşıdurma zamanı həlak olan axund Ağahüseyn  Səfərovun yaxınları ilə əlaqə saxladıq. Məhrumun yaxınları onun zərbələr nəticəsində dünyasını dəyişdiyi barədə məlumatda yanlışlığa yol verildiyini bildirdilər: “Ağahüseynin 76 yaşı var idi və ürək xəstəliyindən əzab çəkirdi. O bazarda qarşıdurma olarkən alış-veriş edirmiş. Ürəyindən ağrıları tutub və xəstəxanaya aparılıb. Orada dünyasını dəyişib. Lakin ona fiziki zor tətbiq edilməyib”.

Bazar müdiri: «Əlağa müəllim məni və burada çalışan yüzlərlə insanı qəbul etmir»

Sökülən bazarın müdiri Fizuli Həsənov qəzetimizə verdiyi açıqlamasında rayon rəhbərliyinin qəzəbinə tuş gəldiyini bildirdi: “Bazar qərəzli şəkildə bağladılar. Məsələ ilə bağlı icra başçısının qəbuluna düşə bilmirəm. Əlağa müəllim məni və burada çalışan yüzlərlə insanı qəbul etmir. Bazarda guya antisanitariyanın olduğunu deyirlər. Bu məlumat yalandır. Bazar uzun zamandır ki, işləyir və sanitar qaydalara əməl olunur. Burada rayonun ən kasıb təbəqəsi ticarətlə məşğuldur. Gündəlik çörəkpulu qazanırdılar. Ona da imkan verilmir. Mən bir adamam, söhbət mənim qazancımdan getmir. Axı burda yüzlərlə adam çalışır”.

Satıcılar çıxılmaz durumda!

Bazarda ticarətlə məşğul olan Zemfira İsmayılova ailəsini bazarda qazandığı qəpik-quruşla dolandırdığını söylədi: “Evdə hamı xəstədir. Burada qazandığım qəpik quruşla ailəmi dolandırırdım. Bura kasıbların bazarıdır. Göy-göyərti meyvə satırıq. Satıcıların əksəriyyəti 60-70 yaşlı ağbirçək qadınlardır. İndi biz harada işləyək?”  Şüküfə Dadaşova oğlunun həbsdə, qızının isə yataq xəstəsi olduğunu söylədi: “21 yaşlı oğlun həbsdədir. Qızım isə yataq xəstəsidir. 134 manat pensiya alıram. Burada qazandığımı iynə-dərmana verirəm. Apteklərə, mağazalara dünya borcum var. 22 ildir bu bazarda işləyirik. İndi gəlib bazarı sökürlər. Borca girib mal almışam. Amma satmağa icazə vermirlər. Bizim səsimizi  eşidən, dərdimizə əlac edən bir kimsə tapılmır”.

Xatirə Tapdıqova isə kreditlə ev aldığını bildirdi: “Dövlətdən pul götürüb ev almışıq. Bazarda göy-göyərti satıb dövlətin borcunu ödəyirdim. Erməni kimi bazara hücum etdilər. Qadınlara, qocalara belə aman vermədilər. Bazarı bağlayıblar, indi burada olanlar çarəsiz günə qalıb. Evimizə bir qəpik belə apara bilmirik. Buradan yüz ailə dolanırdı”. Satıcı Əli Hüseynovda bazarın bağlamasından narazı qaldığını söylədi: “900 manatlıq nisyə mal götürmüşdüm. Bayram qabağı satmaq fikrində idim. Amma imkan vermədilər. 39 yaşım var, ordan-burdan nisyə mal götürüb ailəmə bir tikə çörək qazanıram. Qışdır amma mən pencekdə gəzirəm. İmkan eyləyib özümə kurtka ala bilmirəm. İndi bizi ac qoymaq istəyirlər”.

Bazarın köçürüldüyü yer daha bərbad gündədir

Salyan rayonunda fəaliyyət göstərən Demokratiyaya Yardım İctimai Birliyinin sədri Emil Məmmədov bazar ətrafında baş verənlər barədə qəzetimizə ətraflı açıqlama verdi. Onun verdiyi məlumata görə dövlət başçısı İlham Əliyev 2 il əvvəl bazarın bağlanmaması barədə göstəriş verib: “Adı çəkilən bazar əslində Salyan İstehlak Cəmiyyətinin sədri İbrahim Tağıyevə məxsusdur. Son 15 il ərzində İ. Tağıyevlə icra başçıları arasında baş verən “anlaşılmazlıqlar” necə deyərlər kasıb-kusubun başında çatlayıb. Salyana yeni icra başçısı rayonda aparılan abadlıq işlərində imkanlı şəxs kimi İbrahim Tağıyevin də iştirakını umurdu. Amma açığını desək İ. Tağıyev “bərklik” etdiyindən onun Salyandakı obyektlərinə hücumlar başlayıb. Əslində bağlanmış bazardakı sanitar vəziyyət köçürülməsi nəzərdə tutulan bazardakından heç də fərqlənmir. Əksinə, ikinci bazarda alış-veriş avtomobil yolu  bağlanaraq küçədə aparılır. Yəni bazarın sanitar vəziyyətinə görə bağlanması boş bəhanədir. İri məmurların toqquşmasından isə gündə evinə zor bəla ilə 5-6 manat qazanc aparan göy-göyərti və turşu satanlar itirir, yüzlərlə ailə gündəlik çörək pulundan məhrum olur. Qarşı duran tərəfləri isə bu amil  maraqlandırmır. 2 il əvvəl köhnə icra başçısı R. Bəşirov bazarı bağlamaq istəyirdi. Lakin imkansız satıcıların müraciətləri ölkə rəhbərinə çatdırıldıqdan sonra bazarın fəaliyyətinə icazə verildi”.