Xəbər verildiyi kimi, fevarlın 18-də daha üç əsgərimiz düşmən gülləsinə tuş gələrək, şəhid oldular. Mənbə, əsgərlərin ölm səbəbini atəşkəsin pozulması ilə əlaqələndirsə də, başqa versiyalar istisna olunmur. Belə ki, FaktXəbərə açıqlama verən hərbi ekspert, polkovnik-leytinant Üzeyr Cəfərov bildirdi ki, dünən baş vermiş hadisə və ondan sonra Müdafiə Nazirliyinin verdiyi açıqlama məndə bir az təəccüb doğurur: “Bölgənin ayrı-ayrı hissəsində düşmən bir gündə üç əsgərimizi şəhid edib, bir neçəsini də yaralayıb. Bu hadisə atəşkəsin posulması nəticəsində baş veribsə, “niyə əsgərlər komandirlər tərəfindən qorunmurlar” sualı ortaya çıxır. Burada tam başqa bir versiya - döyüş əməliyyatı daha çox diqqəti çəkir”.

Onun sözlərinə görə, həmin vaxtda yüksək rütbəli şəxslər bölgədə olub və təlimlər keçiriblər: “Bizdə olan məlumata görə, Müdafiə Nazirliyinin rəhbərliyi həmin bölgədə olub. Və orada müəyyən təlim həyata keçirilib. Ağdam, Tərtər və digər yerlərdə, eyni gündə əsgərlərin düşmən gülləsinə tuş gəlmələrinə son illərdə rast gəlməmişəm. Eyni gündə düşmən snayperlərinin bu qədər əsgəri sıradan çıxarması təsadüfi deyil. Orduda hər şey ola bilər. Lakin bununla yanaşı, komandirlərə maksimum tapşırıq verilib ki, əsgərlər düşmən gülləsindən yayınmaq üçün müvafiq tədbirlər görməlidirlər”.

“Son hadisədə hesab edirəm ki, hələ gizli saxlanılan başqa məqamlar da var. Hər halda, bütün məsuliyyət Müdafiə Nazirliyinin üzərinə düşür. Çünki MN-dən məlumat çox gec gəldi. MN hadisəyə axşam saatlarında münasibət açıqladı” - deyə Ü.Cəfərov bidirdi: “Ən dəhşətlisi odur ki, onların açıqlamasında ölən əsagərlərin sayı və düşmənin daha çox itki verdiyi bildirilirdi. Bu cümləyə diqqət yetirin. Əgər düşmən snayperləri bizim əsgərləri qətlə yetiriblərsə, MN hansı yolla düşmən tərəfində daha çox itki olduğunu deyir? Burada atəşkəsin pozulması və qoşunların üz-üzə döyüşmələri faktı görünür. Dünən Baş Qərargah rəsisi Nəcməddin Sadıqov da məsələyə tam aydınlıq gətirmədi. O qeyd etdi ki, adekvat tədbirlər görünür və düşmənin də itkiləri az deyil. Döyüş keçən hər bir şəxs bilir ki, düşmən itkiləri yalnız qarşı-qarşıya döyüş zamanı az olmaya bilər. İstənilən halda, çox üzücü hadisədir. Hesab edirəm ki, belə itkilərin qarşısını almaq üçün ciddi tədbirlər görülməlidir. 2010-cu ilin ilk iki ayında orduda ölənlərin sayı loru dillə desək, kəlləçarxa çıxıb”.

Ü.Cəfərov Daşkəsən hadisəsinə də münasibət açıqladı: “Bu günlərdə Daşkəsəndə qətlə yetirilən zabitin seyfindən çıxarılan küllü miqdarda pul, adamı müəyyən fikirlərə aparır. Döyüş tapşırığı ilə məşğul olmaq göstərişini alan şəxs, görün hansı işlərlə məşğul olub ki, nəticədə belə faciə baş verdi”.

MN-dən gələn ziddiyyətli məlumatlar bu hadisənin təlim zamanı baş verə biləcəyini də istisna etmir. “Biz özümüz araşdırma aparırıq. Əgər təlim zamanı kiminsə günahı ücbatından baş veribsə, sərt reaksiya verəcəyik. Çox maraqlıdır ki, sadəcə açıqlama verməklə müvafiq qurumlar işlərini bitmiş hesab edirlər” – deyə bildirən Ü.Cəfərov orduda cəzasızlıq mühitindən söz açdı: “Deməzdim ki, orduda baş verən neqativ halların səbəbi peşəkarlığın olmaması ilə bağlıdır. Düşünürəm ki, əsas səbəb cinayətkarın cəzalandırılmamasıdır. Daşkəsəndə baş verən hadisə ilə əlaqədar, MN sözçüsü deyir ki, rəhbərliyin göstərişi ilə bütün təsirli tədbirlər görünüb. Hərbidə nizam-intizam qaydalarına pozan əsgər və zabitlərlə qabaqlayıcı və proflaktik tədbirlər keçirilməlidir. Bizdə isə hadisələr baş verəndən sonra nəticəni aradan qaldırmaqdan danışırlar. Olmazmı, səbəblərə yol açan hallar aradan qaldırılsın? Hesab edirəm ki, cəzasızlıq mühiti belə ağır nəticələrə səbəb olur. Mətbuat və biz, bu məsələləri gündəmə gətirəndə, az qala düşmən dəyirmanına su tökməkdə ittiham etsinlər. Amma əslində Azərbaycan əsgərini bir metr torpaq azad etmədən düşmən gülləsinə tuş gətirənlər, birinci növbədə cavabdehlik daşıyırlar. Müvafiq hərbi komandanlığın borcudur ki, belə hadisələr olmamaq üçün qabaqlayıcı tədbirlər görsün”.

Əli Mövlud