«United Enterprises International» şirkətlər qrupunun internet səhifəsi bu yaxınlarda yaradılıb və belə təqdim olunur:
«Bu vebsayt sizə holdinqimiz və ona aid olan şirkətlər barədə məlumat vermək məqsədi daşıyır».
Səhifədə Fövqəladə Hallar naziri Kəmaləddin Heydərovun övladlarının adına rast gəlmək olar. Tale Heydərov holdinqin İdarə Heyətinin sədri, onun qardaşı Nicat Heydərov isə sədr müavinidir. Hər ikisi nüfuzlu London İqtisadiyyat Məktəbində təhsil alıblar.
Səhifədə qeyd olunur ki, holdinqin Azərbaycanda, İngiltərədə və Almaniyada ofisləri var.
Heydərov qardaşlarının rəhərlik etdiyi holdinqin tərkibində Azərbaycanla birbaşa bağlılığı olan şirkətlər də var. Bunlardan diqqətimizi cəlb edən...
«CASPIAN SEA CAVIAR» (Xəzər dənizi kürüsü) şirkəti oldu.
Uzun illər Azərbaycanda Xəzər kürüsünün ixracının o vaxtlar Gömrük xidmətinə rəhbərlik edən Kəmaləddin Heydərovun nəzarəti altında olduğu haqda şaiəylər gəzirdi.
İndi Kəmaləddin Heydərovun oğullarının yaratdıqları holdinqin vebsaytı vaxtilə dolaşan şaiyələri nə dərəcədə həqiqətə yaxın olmasına bir aydınlıq gətirə bilər. Saytda həmçinin «Caspian Sea Caviar» Heydərovların şirkəti kimi göstərilir. Şirkətin direktoru olan Şahin Neməti də elə «United Enterprises International»ın da direktorudur.
«Caspian Sea Caviar» şirkətinin internet saytında on-line kürü mağazası da var. Burada ağbalıq kürüsünün 1.8 kiloqramı 13770 avroya satılır.
VƏ «JALƏ» ŞİRƏLƏRİ
«United Enterprises International»ın saytında qeyd olunur ki, «Jalə» şirələri Azərbaycanda «Gilan Holdinq» tərəfindən istehsal edilir. Əslində, Tale Heydərovun «United Enterprises International» şirkəti həm də «Gilan Holdinq»in beynəlxalq distribyutorudur.
Məlumata görə, Jalə şirələri artıq Almaniya bazarına çıxarılır və yaxın vaxtlarda İngiltərədə də satışa hazırlanır.
Artıq Almaniyada satılan jale sularının İngiltərə bazarına da hazırlayırlar
«United Enterprises International»a daxil olan digər şirkətlər isə əsasən Böyük Britaniyada fəaliyyətlə məşğuldur. Bunlar «Azerbaijan Carpets» – (Azərbaycan xalçaları), «Turquoise Media Company» – (Turkuaz Media Kompaniyası), «Alten Group» turizm şirkəti, Azərbaycan restoranları və başqa səhmdar şirkətlərdir.
ÜSTƏGƏL AVROPA AZƏRBAYCANLILARI VƏ QƏBƏLƏ FUTBOLU
«United Enterprises International» öz internet səhifəsində başqa tərəfdaş kompaniyaları də təqdim edir. Bunlar Azərbaycan çempionatında yarışan «Qəbələ» Futbol Klubu, Avropa Azərbaycan Cəmiyyəti (TEAS) və «Gilan Holdinq»dir.
Tale Heydərov «Qəbələ» Futbol Klubunun da rəhbəridir. Bundan başqa o 2008-ci ildə yaradılan Avropa Azərbaycan Cəmiyyətinın də sədridir. Bu cəmiyyətdə ikinci şəxs - icraçı direktor isə «Xəzər kürüsü»nün direktoru Şahin Nemətidir. «Gilan Holdinq»in isə rəhbəri…
«GİLAN HOLDİNQ»
«Gilan Holdinq»ə rəsmən kimin rəhbərlik etdiyi internet səhifəsindən bəlli olmur. Ancaq bu holdinqin törəmə şirkətlərini rəsmi şəkildə məhz Kəmaləddin Heydərovun oğulları təmsil edirlər.
«Gilan Holdinq»in tərkibinə daxil olan şirkətlər bunlardır:
- Tikinti materiallarının istehsalı zavodları – «Gilan İnşaat»;
- Şərab istehsal edən AGRO-AZERINVEST,
- Qəbələ Konserv Zavodu,
- Qəbələ Fındıq Emalı Zavodu,
- «Jalə» suları,
- Qəbələ Süd Emalı Zavodu,
- spirtli içkilər zavodu,
- dəri emalı zavodu,
- tikiş fabrikləri,
- dəyirmanlar
- «Qəbələ» və «Gilan» hotelləri,
- «İpək yolu» və «Dəniz» restoranları
daxildir.
BU KAPİTAL HARADAN GƏLİR?
Təəssüf ki, adı gedən vebsaytda yetərincə böyük görünən və «United Enterprises International» çətiri altında birləşən bu şirkətlərin kapitalının hardan gəlməsi açıqlanmayıb.
Düzdür, Tale Heydərovun atası Kəmaləddin Heydərov və babası Fəttah Heydərov Azərbaycanda kifayət qədər tanınmış fiqurlardırlar, ancaq dövlət məmurudurlar. Yəni, rəsmən ancaq maaşla dolanırlar.
Çünki Azərbaycan qanunları dövlət məmuruna başqa bir bizneslə məşğul olmağı qadağan edir. Yalnız dövlət məmurunun maaşı ilə holdinq yaratmaq isə mümkün deyil.
Əlbəttə, uşaqları London İqtisadi və Siyasi Elmlər Məktəbində oxutdurmaq üçün vəsaiti qohum-qardaşdan götürülən borc-para ilə birtəhər izah eləmək olar. Amma Avropaya ayaq açan Azərbaycan biznesinin kapital mənbəyinin izahı üçün hər halda daha akademik bir mənbə tələb olunur.
Əslində, prestijli London məktəbinin yetirməsinə böyük biznesi həvalə etməkdə təəccüblü heç nə yoxdur. Ağıla gələn ilk fikir, Heydərov qardaşlarının bacarıqlı biznesmen kimi bu işə cəlb olunmasıdır. Kim istəməz ki, ingiliscə, fransizca danışan, iqtisadi təhsili olan təşəbbüskar gənclər onun biznesinə rəhbərlik etməsin. Amma onların Kəmaləddin Heydərovun ailəsindən çıxması və bizneslərinin birbaşa Azərbaycanda istehsal olunan məhsul və xidmətlərlə bağlı olması faktları çoxlu suallar doğurur.
Bu suaları «United Enterprises International»ın İdarə Heyətinin sədri Tale Heydərov və Holdinqin direktoru Şahin Nematiyə ünvanlamaq istədik.
Ancaq holdinqin ofisində bizə bildirdilər ki, Heydərov qardaşları və cənab Nemətiyə olan suallarımızı yazılı şəkildə göndərək, bundan sonra onları cavablaya bilərlər.
Biz də suallarımızı elektron poçtla yazılı formada göndərdik, xeyli vaxtdır ki, gözləyirik. Cavab gəlsə, açıqlayacağıq./Azadlıq radiosu
