Ötən ilin dekabr ayının 30-da istifadəyə verilən, 1 tağlı sütunsuz formada tikildiyi üçün Bakıda analoqu olmayan “Azadlıq prospekti” metrostansiyası çökmə təhlükəsi ilə üz-üzə qalıb. Bunun səbəbi isə metrostansiyanın üstündə yerləşən park kompleksinin sıradan çıxmasıdır. Ötən həftə yağan güclü qar parkın infrastrukturuna ciddi ziyan vurub.
Belə ki, parkın pilləkənlərində və fəvvarələrin ətrafında iri çatlar yaranıb. Bundan başqa parkın nisbətən kənar hissələrində çökmələr olub və yerə düzülmüş daş plitələr bir-birindən aralanıb. Çökək yerlərdə isə gölməçələr yaranıb. Bir neçə skamya isə çökmə nəticəsində aşıb. Parkın nisbətən ortasına doğru irəlilədikcə istirahət guşəsinin daha bərbad vəziyyətə düşdüyünün şahidi olduq. Həmin hissələr də sürüşməyə məruz qalıb və kiçik yarğanlar əmələ gəlib.
Parkı çökdürən səbəblər...
Parkın metrostansiyaya giriş hissəsində bir neçə fəhlə çalışırdı. Onlar dəmin linglərlə çat yaranmış yerdən piltələri çıxarırdılar. Vaqif adlı işçi deyir göstəriş verilib ki, piltələri söksünlər və yeniləsinlər. Vaqifdən onu da öyrəndik ki, park salınan ərazi əvvəllər çökəklik sahə olub. Sonrdan həmin əriaziyə xeyli torpaq daşınıb və çökəklik doldurulub. Ancaq tökülən torpağın az olması və bərkitmə işlərinin apırlmaması səbəbindən park çöküb. Fəhlə deyir ki, piltələrin yerə düzülərkən semetdən və digər lazımı materiallardan çox az miqdarda istifadə olunması da ərazidə fəsadların yaranmasına səbəb olub.
Qeyd edək ki, metronun «Azadlıq prospekti»ni “Azərtunelmetrotikinti” ASC tiksə də, stansiyanın yerüstü ərazsinin təxminən 10 min kv/m olan park hissəsinin layihəsini “Bakıdövlətlayihə” İnstitutu tərtib edib. İki ilə ərsəyə gələn metrostansiya və park cəmi iki ay davam gətirdi.
Onu da bildirək ki, əriyən qarın suyu metro stansiyasının içinə tökülür. Stansiyanın giriş hissəsinin tavanında iri çatlar əmələ gəlib və oradan aşağı su sızır.
Bakı Metropoliteni: «Parkın metroya aidiyyatı yoxdur»
Problemlə bağlı Bakı Metroploteni ilə əlaqə saxladıq. Qurumun mətbuat xidmətinin rəhbəri Nəzakət Tanrıverdiyeva deyir ki, parkın metropolitenə heç bir aidiyyatı yoxdur: “Problem yaranıbsa, aidiyyatı qurumlar həll edəcəklər. Həmin ərazinin tikintisi və yenidən qurulması Metroploten həyata keçirməyib”.
Emil Axundov: «Bu, artıq cinayət əməldir»
Problemə münasibət bildirən tanınmış memar, şəhərsalma üzrə ekspert Emil Axundov deyir ki, metroplotendə hazırkı vəziyyət olduqca acınacaqlıdır. Onun sözlərinə görə, dünya ölkələri metrolardan nəqliyyat vasitəsi ilə yanaşı yeraltı sığınacaq, yaşayış yeri kimi də istifadə edir. Ancaq Azərbaycan vətəndaşları metrodan normal gediş-gəliş üçün də yararlana bilmirlər. Bunun səbəbkarı isə Bakı Şəhər İcra Hakimiyyətidir: “1978-ci ildə Bakının baş planı hazırlanmışdı, ancaq o plandan bu gün heç bir iz qalmayıb. O vaxtlar Bakı şəhərinin böyüyü var idi. İndi BŞİH-ni doğrayıb yüzlərlə struktura bölüblər. Həmin strukturlar isə şəhərin düşməninə çevrilib». E. Axundov deyir ki, “Azadlıq prospekti” metrostansiyasının üzərində olan parkdakı vəziyyətdən xəbərdardı: “Bu parkın belə bir vəziyyətə düşməsi birdən-birə olmayıb. İlk öncə şəhərin hansı yeri olur olsun, park salınırsa, yaşıllaşdırma işləri aparılırsa bunun bir planı olmalıdır. Layihə hazırlanmalı və Bakı Şəhər İcra Hakimiyyətinin aidiyyatında olan memarlıq şurasında müzakirə olunub qərar verilməlidir. İndi bu işləri yaşıllaşdırma idarəsinə həvalə ediblər. İdarə isə ancaq ağac əkməklə məşğuldur”. E. Axundov deyir ki, plan əsasında istənilən quruculuq işini sıravi insanlar deyil, səriştəli və təcrübəli şəxslər həyata keçirməlidirlər: “Mühəndis, memar, geoloqlar bu işlə məşğul olmalıdır. İndi yoldan keçəni çağırıb memar, geoloq edib əlinə bel veririlər ki, başla işə. Konkret olaraq göstərici var ki, metropoliten ərazisi qorunan zonadır və burda heç bir tikili olmamalıdır. Bu gün götürüb metronun üstündə park tikiblər. Təbii ki, həmin parka su da töküləcək, rütübət də olacaq və bir də görəcəklər ki, metro çökdü. Minlərlə insanın həyatını təhlükəyə atmaqla riskə gedirlər. Metronun üzərində park tikiblər, heç olmasa bunu normal şəkildə edəydilər. Həmin parkda yerə nə beton, nə setka qoymadan palçığın üstünə piltələri əyr-əyri düzüblər”. Memar deyir ki, bu, cinayət işidir və məsələ prokurorluq səviyyəsində həllini tapmalıdır: “Bu işlərdə rolu keçən insanları məsuliyyətə cəlb edib cəzalandırmaq lazmıdır. Cavab versinlər görək bu işlər kimin sərəncamı ilə həyata keçirilib, millətin pulları niyə çöllərə tökülür?”/Vüsalə/Bizim Yol
