Xəbər verildiyi kimi İsrailin xarici işlər naziri Aviqdor Liberman fevralın 9-u Azərbaycana səfər edəcək. Səfər zamanı konkret olaraq, hansı məsələlərin müzakirə olunacağı hələlik məlum olmasa da, bunu təxmin etmək o qədər də çətin deyil. Eyni zamanda belə səfərlərin mənasız və Azərbaycan tərəfinə ziyanlı olacağını iddia edənlər də var.
Sözügedən mövzu ilə əlaqədar DEVAMM-ın sədri Hacı İlqar İbrahimoğlu FaktXəbərə açıqlamasında bildirdi ki, bu səfəri birmənalı olaraq, cinayətkarın vətənimizə gəlişi kimi qiymətləndirirəm. İsrailin mövcudluğu sual altındadır: “Bu müsəlmanların qanı üzərində meydana çıxmış bir rejimdir. Hesab edirəm ki, Azərbaycan müsəlman ölkələrilə həmrəylik göstərməlidir. Hər zaman Türkiyə ilə sinxron hərəkət etməyimizin vacibliyini vurğulayırlar, bu məsələdə də eyni önəm zəruridir. Türkiyədə nələrin baş verdiyi göz qabağındadır. Düşünürəm ki, bu gün İsrail rejimilə ümumiyyətlə münasibət qurulmamalıdır”.
İsrailin xarici işlər naziri Aviqdor Libermanın Azərbaycana gəlişi, rəsmi Bakının müsəlman dövlətləri arasında imicinə zərbə vura bilərmi - sualına, H.İ.İbrahimoğlu cavab olaraq bildirdi ki, əfsuslar olsun ki, İslam ölkələri bu məsələylə əlaqədar prinsipal mövqe sərgiləmir. Bu baxımdan Azərbaycan da pis nümunələr götürüb.
“Düşünmürəm ki, bu səfər Türkiyə-Azərbaycan arasında münasibətlərin soyuqluğuna səbəb ola bilsin. Ümumilikdə hesab edirəm ki, bu gün Azərbaycan İsrail rejimilə ehtiyatlı davranmalıdır” - deyə H.İ.İbrahimoğlu bildirdi.
Qarabağ Azadlıq Təşkilatının sədri Akif Nağı bizimlə söhbətində bildirdi ki, Ermənistan və İsrail işğalçı dövlətlərdilər. Biz bu vaxta qədər onların arasında heç bir fərq qoymamışıq: “İsrail Fələstin torpaqlarını işğal edib, indi də fələstinliləri oradan çıxarmağa çalışır. Dünyada görünməmiş haqsızlıq və ədalətsizlikdir. Nə Amerika, nə Avropa nə də başqaları haqdan, ədalətdən və insan hüquqlarından danışmamalıdırlar. İsrailin bu hərəkətlərinə göz yumurlarsa, o dövlətlərin demokratiyadan danışmağa haqları yoxdur. Bu məsələyə, fələstinliləri müdafiə etmək və müsəlmançılıq təəssübkeşliyindən deyil, insani münasibət olaraq və dünyanın idarə olunması prinsipləri əsasında yanaşmaq lazımdır. Yəhudilərdən çəkinmədən həqiqət deyilməlidir”.
A.Nağı əlavə etdi ki, Azərbaycan məcburiyyət qarşısında müəyyən əlaqələr saxlayır: “Amma bu səfərlərin və görüşlərin keçirilməsinə heç bir ehtiyac yoxdur. Bildiyimiz kimi bu yaxınlarda İsrailin müdafiə naziri Ehud Barak Türkiyəyə səfər etmişdi. Onunla prezident və baş nazir görüşmədi. Hər halda dövlətin hansı yollarla yaranmağından asılı olmayaraq, mövcuddur. Buna görə də müəyyən münasibətlər qurula bilər. Amma dost səfərlərinin qurulmasına və geniş şəkildə səfərlərə nə ehtiyac var? Hesab edirəm ki, bu cür dost adı ilə reallaşan görüşlərə yol vermək olmaz”.
Bu səfərdə hansı məsələlərin müzakirə olunacağı hələlik tam məlum deyil. Azərbaycan müsətəqillik qazanan gündən bütün iqtidarlar İsraillə dost münasibətləri qurublar. Bu xəttin yanlış olduğunu düşünürəm – A.Nağı bildirdi: “İsrail kapitalı və lobbisi hesabına dünya siyasətinə təsir imkanları qazanıb. Azərbaycan öz xarici siyasətində yəhudilərin dəstəyinə arxalanaraq siyasi strategiyasını və taktikasını müəyyənləşdirir. Bu siyasət yanlışdır”.
A.Nağı bu görüşdə hansı məsələlərin müzakirə olunacağını dəqiq deməsə də bəzi ehtimallar irəli sürdü: “Regionda və Yaxın Şərqdə mürəkkəb məsələlər və Azərbaycan-Amerika münasibətləri var. Lakin ciddi və konkret məsələlərdən söhbət gedə bilməz. Azərbaycan istəyir ki, Qarabağ münaqişəsilə əlaqədar beynəlxalq təşkilatlar arasında yəhudi lobbisi tərəfindən dəstəklənsin. O da aldadıcı görüntüdür. 2008-ci il BMT BA-da Qarabağ məsələsi müzakirə olunanda İsrail nümayəndəsi bitərəf qaldı. Biz bitərəf qalan və əleyhimizə səs verən dövlətlərin səfirliklərilə görüşlər təşkil etdik. İsrailin səfirindən cavab tələb etdik. Lakin mövqelərini izah edə bilmədilər. Azərbaycanın mənafeyinə uyğun addım ata bilmirlərsə, onlar ilə bu yaxınlıqların heç bir mənası yoxdur”.
Yaxın Şərqdə prosesləri nəzarətdə saxlamaq üçün ABŞ və Qərb heç zaman İsraildən istifadə etməyib. İsrail daim bütün dövlətlərlə qarşıdurma vəziyyətində olub - A.Nağı qeyd etdi: “Qərb, İsraildən ancaq Ərəb dövlətlərinə hücum etmək və gərginlik yaratmaq üçün təziq vasitəsi kimi istifadə edib. Ola bilsin ki, İsrail Türkiyənin Yaxın Şərqdə nüfuzunun artmasından ehtiyat edir. Son dövürdə - Ərdoğan hakimiyyəti zamanı Ərəb dövlətlərilə Türkiyənin münasibətləri yaxşılaşır”.
Əli Mövlud
