Azərbaycan silahlı qüvvələrində növbəti hadisə nəticəsində 6 hərbiçi dünyasını dəyişib. Belə ki, ölənlərin arasında yüksən rütbəli şəxslərin olması da məlum olub. Hadisnin səbəbləri dəqiq açıqlanmasa da, ekspertlər müxtəlif versiyalar irəli sürürlər. «Doktrina» Jurnalistlərin Hərbi Araşdırmalar Mərkəzinin direktoru Cəsur Sümərinli FaktXəbərə hərbçilər arasında analoji insidentlərin 2008-ci ildən başlayaraq daha da artdığını bildirdi: “2008-ci ildən silahlı qüvvələrdə qanunsuz hərəkətlərin sayı artıb. 2009-cu ildə təqribən 10 bu kimi hadisə nəticəsində 28 hərbiçi dünyasını dəyişib. Eyni zamanda 2010-cu il yanvarın əvvəlləri də belə hadisəyə şahid olduq. Hər halda təəssüflənirik”.

C.Sümərinli bildirdi ki, Azərbaycanın silahlı qüvvələrində kifayət qədər dedavşina halları var. Belə halları rəsmi qurumlar təkzib etsələr də, reallıq göz qabağındadır: “Bütün hadisələri nəzərə alıb, deyə bilərik ki, silahlı qüvvələrdə baş verən neqativ halların səbəbləri bunlardan ibarətdir; orduda  qanunverici bazanın təkmilləşməməsi, qanunun aliliyinin təmin olunmaması, peşəkar və məsuliyyətli kadr çatışmamazlığı, əsgərlərin hazırlıq səviyyəsinin aşağı olması, hərbi xidmətə çağırışın təşkilində indiyə kimi qeyri-qanuni hallar, hərbi qulluqçuların karyera imkanlarının məhdudluğu, komandirlərin vəzifə səlahiyyətlərinə məsuliyyətsiz yanaşmaları, kiçik rütbəli komandirlərin sosial durumlarının aşağı olması,  hərbi hissələrdə rüşvət halları, qeyri odekvat cəza üsullarının təşkil olunması, döyüş xidmətinin düzgün tənzimlənməməsi və digər hallar belə hadisələrin ortaya çıxmasında səbəb olur”.

C.Sümərinli bir neçə gün əvvəl müdafiə nazirinə şöhrət ordeninin verilməsinə də münasibət bildirdi: “Hesab edirəm ki, Azərbaycan silahlı qüvvələrində hansısa yüksək rütbəli şəxsə orden və medalların verilməsi yersizdir. Amma son zamanlar müşahidələrimiz nəticəsində belə bir qənaətə gəlmək olar ki, məmurlar vəzifədən çıxarılma ərəfəsində ordenlərlə təltif olunurlar. Bu da onun vəzifədən sonrakı təhlükəsizliyinin qarantıdır. Çox böyük ehtimallara görə Səfər Əbiyevə orden verilməsi məhz bu istiqamətdə hesablanıb. Bildiyimiz kimi fevralın 5-də S.Əbiyevin bu vəzifəyə təyin olunmasının 15 ili tamam olacaq”.

Hər halda hadisə baş verib, altı ailə hüzn içindədir. İndi biz nəticədən danışmalıyıq. İllərlə baş verən cəzasızlıq mühitində belə hallar gözləniləndir – bu sözləri FaktXəbərə ehtiyatda olan polkovnik-leytinant Üzeyr Cəfərov bildirdi: “Seyfəli poliqonunda hadisə baş verəndə Orxan Səfərovun yüz faiz günahı var idisə, dəfələrlə çox hərbi hissə rəhbərliyi məsuliyyət daşımalıydı. Çünki,  onlar vaxtında tədbirlər  görmədiklərinə görə hadisə baş vermişdi. Daşkəsən hadisəsi də ordunun imicini korlayan olaydır. Ölənlər arasında çox yüksək rütbəli şəxslər var. Bu insanlar müəyyən şəxslərin məsuliyyətsizliklərinin qurbanı olublar. Ona görə də çox istərdim ki, bu hadisə yüksək səviyyədə araşdırılsın və layiqli qiymətini alsın”.

Ü.Cəfərov əlavə etdi ki, hərbi hissə döyüş tapşırığını yerinə yetirən zaman hadisə baş verib: “Buna görə də hadisəni h/hissənin öz əsgəri törədib. Müdafiə nazirliyi açıqlama verəndən sonra məsələyə aydınlıq gələcək. Bu məsələ ölkənin və ordunun adı ilə bağlı olduğu üçün kimliyindən asılı olmayaraq həmin şəxslər cavabdehlik daşıyıb, layiqli cəzalarını almalıdırlar”.