- Azərbaycanda Fələstin səfirliyi nə vaxt fəaliyyətə başlayacaq?

- Bildiyiniz kimi, mənim ofisim Daşkənddə yerləşir. Azərbaycana səfərimin səbəbi bizə ayrılmış bina və yaşayacağım mənzillə tanış olmaq, burada səfirliyimizi açmaqdır. İki ay ərzində səfirliyin rəsmi olaraq fəaliyyətə başlayacağını düşünürük. Azərbaycanda olduğuma görə çox sevinirəm. Azərbaycan bizim üçün dost, qardaş ölkədir. Mən burada özümü qürbətdə hiss etmirəm. Özbəkistana qayıdaraq təhvil-təslimdən sonra yenidən Azərbaycana gələcəyəm. Hiss edirəm ki, burada dostlarım, yaxınlarım var. Azərbaycanın sürətli inkişafı məni sevindirir. Əminəm ki, yaxın illərdə Azərbaycan müasir, inkişaf etmiş dövlətə çevriləcək, Azərbaycan xalqı ölkəsi ilə fəxr edəcək.

- Fələstinin neçə ölkədə səfirliyi var?

- Fələstinin 93 ölkədə səfirliyi fəaliyyət göstərir.

- Fələstinin xarici işlər naziri Riyad Malikinin Azərbaycana səfərindən sonra iki ölkə münasibətlərində hansı dəyişikliklər baş verib?

- Bu səfərdən sonra iki dövlət arasında əlaqələr güclənməyə başlayıb. Nazirin səfəri Fələstin və Azərbaycan xalqları arasında dərin əlaqələrin olduğunu bir daha nümayiş etdirdi, göstərdi ki, iki dövlət arasında əlaqələr davamlı olacaq və inkişaf edəcək. Səfər zamanı Azərbaycan prezidenti İlham Əliyev Fələstin dövlətinin lideri Mahmud Abbası Azərbaycana rəsmi səfərə dəvət edib. Fələstin dövlətinin lideri sevinclə, məmnuniyyətlə bu dəvəti qəbul edib. Səfərin yaxın vaxtlarda - bu il ərzində həyata keçiriləcəyi gözlənilir.

- İki ölkə arasında siyasi, iqtisadi-ticari və humanitar sahədə əlaqələr hansı səviyyədədir? Bu əlaqələri genişləndirmək və dərinləşdirmək üçün hansı işlər görülür?

- Azərbaycan və Fələstin arasında tarixi əlaqələr var - biz müştərək bir tarixə malikik. Yüzlərlə fələstinli tələbə Azərbaycan universitetlərinin məzunudur. Hətta bu gün Azərbaycanda onlarla tələbəmiz təhsil alır. Keçən il 18 fələstinli Azərbaycan Tibb Universitetinə qəbul olunub. Bu, onu göstərir ki, Fələstin rəhbərliyi və xalqı Azərbaycanda təhsilin səviyyəsindən razıdır.

- Tələbələr Azərbaycan dövlətinin hesabına təhsil alırlar, yoxsa öz hesablarına?

- Tələbələrin bir qismi Azərbaycan dövlətindən təqaüd alır, bəziləri isə öz şəxsi hesablarına oxuyur. Təkcə Tibb Universitetində deyil, Diplomatiya Akademiyası və başqa ixtisaslaşmış təhsil ocaqlarında da fələstinli tələbələr təhsil alır. Biz bu tələbələrin sayını artırmağı planlaşdırırıq.

- Ölkələr arasında iqtisadi əlaqələr qurulubmu?

- İqtisadi əlaqələr var. Özəl sektorlar arasında əməkdaşlıq mövcuddur. Biznesmenlər ticarət palatalarında, sərgilərdə iştirak edir. Ən çox əməkdaşlıq kənd təsərrüfatı sahəsindədir. Lakin bu əlaqələr dövlət səviyyəsində deyil. Bakıda Fələstin səfirliyi açıldıqdan sonra biz ümid edirik ki, iqtisadi əlaqələr inkişaf edəcək, hökumət səviyyəsində razılaşmalar, müqavilələr, sazişlər imzalanacaq.

- Yaxın Şərq probleminə dair Azərbaycanın mövqeyi Fələstini qane edirmi? Azərbaycan bu problemin həllində vasitəçi ola bilərmi?

- Biz Fələstin dövləti olaraq Azərbaycanın mövqeyindən çox razıyıq. Azərbaycan Fələstin xalqı ilə həmrəydir, Qəzzanın blokadaya alınmasının əleyhinədir, Fələstinlə eyni mövqedədir. BMT-nin Təhlükəsizlik Şurasında Azərbaycan daim Fələstinin lehinə səs verir. Azərbaycanın vasitəçiliyinə gəldikdə isə, mən bunun baş tutacağını güman etmirəm. Biz bu yöndə heç bir səyin əleyhinə deyilik. Bildiyiniz kimi, bu münaqişə 60 ildir davam edir. Biz bütün səyləri alqışlayırıq, amma İsrail hökuməti hər hansı vasitəçiliyi qəbul etmir.

- İslam Konfransı Təşkilatının bu problemə yanaşması sizi qane edirmi?

- Məlum olduğu kimi, İKT 57 islam dövlətini təmsil edir. İKT-nin mövqeyi bu dövlətlərin hamısının mövqeyidir. Sözsüz ki, İKT İsrailin Fələstin torpaqlarını işğal etməsinə qarşıdır. Bu səbəbdən biz İKT-dən razıyıq və bu təşkilatın üzvüyük.

- Dağlıq Qarabağ problemi ilə tanışsınızmı? Fələstinin bu problemə münasibəti necədir?

- Dağlıq Qarabağ problemi Fələstin probleminə bənzəyir. Avropada yəhudilərə qarşı Holokost törədiləndə Fələstin xalqı yəhudiləri qarşıladı və onlara Fələstin torpaqlarında yer verdi. Lakin sonradan yəhudilər Fələstin xalqını öz yerlərindən qovdular. Eyni problem Dağlıq Qarabağda da yaşanıb. Dağlıq Qarabağdakı Azərbaycan xalqı erməniləri qəbul edib, ermənilər Azərbaycan torpaqlarında məskunlaşıb. Bundan sonra onlar Azərbaycan xalqına qarşı cinayət və qəsd ediblər, onları Dağlıq Qarabağdan qovublar, Azərbaycan torpaqlarını işğal ediblər. Ümid edirik ki, həm Fələstində, həm də Qarabağda haqq qalib gələcək.

- Ərəb Dövlətləri Liqasının Ankaraya səfir təyin etməsinin keçən həftə baş vermiş İsrail-Türkiyə diplomatik qalmaqalı ilə bağlı olduğunu söyləmək olarmı?

- Bu səbəblə olduğunu düşünmürəm. Türkiyə islam ölkəsidir və Fələstin problemi ilə bağlı prinsipial mövqeyə malikdir. Biz Fələstin dövləti olaraq Türkiyə xalqına, rəhbərliyinə hörmət bəsləyirik. Biz həm Azərbaycan, həm də Türkiyə xalqı ilə eyni ümmətik. Türk xalqı ilə Fələstin xalqı bir kökdəndir, ortaq tarixi var. Bu gün Türkiyə dünyada böyük nüfuza malikdir. Heç kim Türkiyənin başının üstündən aşaraq iş görə bilməz. Türkiyə mövqeyinə, siyasi-iqtisadi gücünə görə regiona təsir edir, hətta beynəlxalq səviyyədə təsir gücünə malikdir. Bu səbəbdən istər Ərəb Liqası, istər BMT, istər Avropa Birliyinin Türkiyə ilə əlaqələr qurması zəruridir. Çünki bu gün heç kim Türkiyə ilə hesablaşmaya bilməz.